الشناوي يعلق على تأجيل مسلسله "لام شمسية" لـ2023

بعد إعلان الشركة المنتجة لمسلسل  "لام شمسية" للفنانة مني زكي تأجيله من رمضان 2022 إلى رمضان 2023 بسبب إصابة عدد من طاقم العمل بفيروس كورونا، وحفاظا على حياة الأفراد، جاء قرار الشركة المنتجة.

 

والمسلسل تأليف الكاتبة مريم نعوم وإخراج كريم الشناوي، ومن جانبه قام كريم الشناوي بكتابة بوست على موقع تواصل فيس بوك الخاص به، معلقا على تأجيل المسلسل قال فيه:

"بعد خبر تأجيل المسلسل امبارح، جالي تليفونات ورسائل كتير لأصدقاء بيطمنوا وبيدعموا القرار.. أنا بس حابب أوضح إني مبسوط بالقرار وممتن لكل الشركاء في العمل اللي حطوا مصلحة المشروع قبل مصلحتهم من أول المنتج وشركة الإنتاج والأساتذة الممثلين والأساتذة رؤساء الأقسام وكل الشركاء في العمل اللي بذلوا مجهود كبير في الفترة اللي فاتت ولسه عندهم الحماس لبذل مجهود أكبر لما نستكمل العمل.. إحنا عمرنا ما بنضمن النتيجة لكن دورنا نوفر أفضل ظروف ممكنة للشغل والحقيقة دي القناعة اللي عند كل فريق العمل ودي حاجة تفرح جدا.. حابب كمان أشكر فريق الإخراج اللي أنا حقيقي محظوظ إني بشتغل معاهم واللي كانوا شريك أساسي في كل نجاح حققنا قبل كده وامبارح كنت ممتن جدا إنهم حولوا قرار صعب زي ده لقرار سهل ومفهوم ومنطقي حتى لو بيلخبط حساباتهم الشخصية، ودي حاجة بتؤكد فخري واعتزازي بفريق الإخراج اللي بشتغل وسطهم.. حاجة أخيرة وشخصية، امبارح كانت الذكرى السنوية الأولى لوفاة عمتى مها الشناوي، وقعدت افتكر كل الكلام اللي كانت بتحكيهولي عن الصناعة وإزاي هنفضل طول الوقت قدام خيارات صعبة ولازم نقدر عليها، وفي نفس الوقت نحافظ على شغفنا للشغل اللي بنعمله. فكنت مبسوط إنها حاضرة ومؤثرة في يوم زي امبارح".