هداية ملاك تكشف رحلة التتويج بالبرونزية الأولمبية

 

 

قالت هداية ملاك بطلة التايكوندو: "مكنتش مصدقة الفوز بالبرونزية، وطرت من الفرحة لما خلصت الماتش أمام الأمريكية لصالحي، وحسيت إنها هدية من ربنا ليا، لأني كنت متأخرة في النتيجة حتى مع بداية الشوط الثالث".

 

 

وأضافت خلال لقائها ببرنامج "معكم" الذي تقدمه الاعلامية مني الشاذلي بقناة "سي بي سي": "بعد فوزي بالبرونزية جريت علشان أشجع سيف عيسي".

 

 

وتابعت: "أول لما كسبت البرونزية كلمت والدي وزوجي، وحسيت بفرحة المصريين وتشجيعهم ليا".

 

وأكدت: "مكنتش متوقعة الاحتفال الشعبي والرسمي بعد وصولنا للقاهرة ولقيت الناس كلها بتشجعنا وتحتفل بينا".

 

ولفتت: "منذ حصولي على برونزية أولمبياد ريو دي جانيرو، كنت عايزة أغير الوزن من 57 كيلو الي وزن 67 وفيه ناس كتير حذرتني ولكني قلت أجرب وأخوض التجربة وملقتش حد بيدعمني غير زوجي ووالدي، والمشوار في بدايته كان صعب لأني بدنيا مكنتش قوية زي المنافسين اللى في الميزان الجديد لحد لما بدأت ألاقي نفسي وأكسب وأعمل تصنيف عالمي ليا".

 

وأكملت: "غيرت وزني وكان عندي إصابة في الكاحل وإصابة في الظهر وكان صعب ألحق التصفيات المؤهلة للأولمبياد، وكنت بعيط مش علشان الوجع ولكن علشان الخوف من عدم اللحاق بالتصفيات المؤهلة لأولمبياد 2020 والحمد لله بدعم طبيب المنتخب وكل اللى حواليا نجحت في التأهل".