عاجل| "منيع" ينفي هروبه وتجنيسه بعد أولمبياد باريس 2024
شريف مدحت
قال عبد اللطيف منيع بطل المصارعة الرومانية، إنه لن يخرج من مصر نهائيا من أجل التجنيس لدولة أخرى بعد أولمبياد باريس 2024.
وأضاف عبد اللطيف منيع، لا أعرف لماذا يتم الحديث عني بأنني سأتواجد مع دولة أخرى بعد الأولمبياد، كل هذا الكلام غير صحيح نهائيا.
وتابع عبد اللطيف منيع، أنا مرتاح في مصر واتحاد المصارعة السبب في الإشاعة لأنني طلبت الباسبور الخاص بي بعد نهاية منافسات الأولمبياد.
واستكمل عبد اللطيف منيع، أنا مرتاح في مصر ومش ههرب ولا هتجنس لأي دولة نهائي، وصعب أسيب أهلي وبيتي لأنهم بيعتمدوا عليا أنا وبس.
وزاد عبد اللطيف منيع، أنا عندي 28 سنة ومفيش أي تقصير معايا ومش هسيب مصر ومش هبعد وبعد خسارة في الأولمبياد لما قولت كلمة “في المشمش” طلعوني تريند وأنا كنت خارج زعلان.
وكان عبد اللطيف منيع قد نشر رسالة بعد خسارة برونزية أولمبياد باريس 2024 وقال، اللحظة دي من أصعب لحظات حياتي، لحظة أنا استوعبت فيها إني أنا ضيعت حلم طفولتي الحمد لله أنا عايز دعواتكم بس لي إني أنا أرجع أتمرن زي الأول بنفس الحماس والشغف اللي جوايا.
واختتم عبد اللطيف منيع وقال، شكرا لكل الناس اللي دعت لي وكلمتني أنا أسف إني أنا مردتش على بعض الناس بس غصب عني والله شكرا جدا لكل الناس لدعمي شكرا للدولة المصرية وشكرا لسعادة الرعاة والوكيل الخاص بي وشكرا للمدربين والاتحاد.
جوجل نيوز
