إبراهيم فايق: ‏خسارة كارثية لمنتخب مصر الأولمبي وهذه هي أسبابها

علق الإعلامي إبراهيم فايق علي الخسارة الثقيلة لمنتخب مصر الأولمبي بسداسية أمام المغرب في لقاء تحديد بطل برونزية أولمبياد باريس 2024.

وقال فايق عبر صفحته الشخصية علي الفيسبوك: "خسارة كارثية.. فرق واضح في كل حاجة.. احنا ناس بنشتغل اليوم بيومه.. ارزقيه على باب الله.. بنفرح باليومية اللي نخدها وبنكسل نشتغل تاني يوم.. ما هي بتيجي بالجدعنه والفهلوه.. أخطط ليه وارتب ليه واشتغل قبلها بسنين ليه؟!!" .

وتابع :" ‏دي أقصى حاجة ممكن تتعمل في حالة اللا تخطيط دي.. جهود فردية من اللعيبة أحيانا.. رغبة تزيد وتقل.. نجاح مدرب بشكل أحادي جدا في ظل مقاومة لكل طلباته.. يعني إنت في حالة العبث دي اخدت كل حاجة تقدر تاخدها". 

واستكمل: "‏مستحيل تقدر تنافس المنظومة الجماعية اللي عندها خطة وأهداف واضحة وشكل ونشأة معينة بيوصل أعلى رتم فيها في البطولات الكبيرة علشان كده بكل تقدير ببارك للمنتخب المغربي.. حقهم وعن جدارة".

واختتم: "‏واحنا خلينا واقعيين مش هيبقى معندناش ونتساوى باللي اجتهد ونظم ورتب لنفسه من سنين.. حزين علشان اللاعيبه بتاعة منتخب مصر الأولمبي دي والجهاز تعبوا جدا وكانوا يستحقوا ختام أفضل بس مستوعب أنهم اشتغلوا في لا منظومة موجودة من زمان بلا أي نظام.. فالعيب مش هيبقى عندهم أبدا".