عاجل
الجمعة 29 مارس 2024
رئيس مجلس الإدارة
هبة صادق
رئيس التحرير
أيمن عبد المجيد
اعلان we
البنك الاهلي

بكلمات مؤثرة و"فوتو سيشن" لينا شاكر تعلن إصابتها بالسرطان

الإعلامية لينا شاكر
الإعلامية لينا شاكر

بكلمات مؤثرة ومجموعة صور أعلنت الإعلامية "لينا شاكر" المذيعة بالتلفزيون المصري، حكايتها مع الإصابة بالسرطان، وتضامن عدد من الإعلاميين معها بنشر صورها والدعاء لها في مقدمتهم الإعلامي شريف مدكور الذي نشر صورته وصورة لينا على صفحتها الشخصية على “فيس بوك“ قائلا “إحنا صحاب في كل حاجة حتى السرطان“.



 

كما نشرت صفحات العاملين بماسبيرو صورها مصحوبة بتمنيات الشفاء لها.

 

وكتبت “لينا على صفحتها الشخصية بموقع التواصل الاجتماعي "فيس بوك" قصة إصابتها ووالدتها بالسرطان قائلة “أنا عشت مع أمي الله يرحمها تجربة الكانسر بكل حذافيرها وتفاصيلها من يوم أما اتشخصت ليوم وفاتها كانوا ١١ سنة ونصف.

 

كمية الألم اللي عشته معاها في التجربة دي مرعب وكانت دعوتي لربنا انه يخفف عنها ويقدرني اني اسعدها.. وأكيد كنت بفكر مع نفسي ليه كل ده، قبل وفاتها بيومين واحنا في المستشفى لقيتني بكتب كلام وكأني بكتب نعيها المهم إن في اللحظة دي شوفت حكمة ربنا بالنسبة ليا في كل اللي عدى، وحمدته وشكرته لأني حسيت إن دي كانت أحلى حاجة أنا عملتها في حياتي، وكأن ربنا إداني وقت أحبها اكتر وأدلعها وأكون لها بنت كويسة وأكون جنبها في كل لحظة زي ما كانت طول عمرها شيلانا عشان هي حقيقي كانت ملاك واحن واطيب ست في الدنيا.

 

الدكتور اللي عملها الكشف أول مرة زعقلي وقالي دي بتموت انتو جهلة، بس هي ما ماتتش وقتها وعاشت الحمد لله والدكاترة بعد كده قالولي إنها كانت بالكتير تعيش خمس سنين وده ما حصلش واتوفت بعدها ب١١ سنة ونصف

 

ربنا قادر على كل شيء مهما كان عندنا علم هو له وقت وقدره أكيد مش عندنا إحنا كبشر، بعدها بقيت بقول كتير انا مش ماسكة في الدنيا ومستعدة امشي في اي لحظة لأني ما بقتش فرحانة بحاجة خلاص

 

قوم يجيلي صديقي الأنتيم يجيلوا كانسر، طبعا واحدة زيي عندها الخبرة الطويلة دي حقيقي اتصدمت أما عرفت بس زي ما واجهت كل لحظة مع أمي بقوة هو كمان واجه الفترة بتاعت العملية والكيماوي بقوة، وربنا يديم عليه الشفا والصحة.

 

اتفقت معاه، وهو في جلسة الكيماوي يوصفلي الإحساس بالظبط، عشان كنت عايزة أعرف ماما الله يرحمها كانت بتحس بإيه، ولاني مش ناسية في واحدة من جلسات الكيمو بتاعت ماما كانت في واحدة ست في جلسة كيمو برضه جنبنا بس كانت بتتألم وبتشتكي لربنا بصوت عالي.. الست دي وجعتلي قلبي وبقيت أبص لماما وحسيت قد إيه أمي ست قوية وحمولة الله يرحمها

 

المهم أنا كان بقالي سنة بحاول أخلي شعري كيرلي طبعا هي معاناة بجد بس عشان اصمد، اشتريت باروكة عشان ألبسها في الشغل لحد ما شعري يظبط ويتحسن، وجيت في وقت بصيت للباروكة كده وقلت تفتكري حتحتاجيها في يوم لو أخدتِ كيمو؟ وده ماكانش يقين بس هي فكرة خطرت على بالي واول أما خلصت السنة وشعري ابتدي يتحسن ويبقي كيرلي حصلت المفاجأة إني بالصدفه أحس ان في حتة بلية كده في جسمي، وفورا رحت أشوف إيه دي ومن هنا ابتديت الرحلة

 

عملت الفحوصات والتحاليل واتشخصت وعملت العملية واخدت الكيماوي وبعدها الاشعاعي

 

الحقيقة إن ما خدتش الخبر ده زي بقية الناس، إن صحيح جالي لحظة الانهيار كانت وانا بعمل المموجرام وماكنتش لسه اتشخصت بس لأني كنت بدعي ربنا انه ياخذني وانا على رجلي وفي صحتي وكنت متصورة انه حيكتبهالي بس في اللحظة دي زعلت لأني ابتديت احس انا داخلة على ايه، وفكرني بكل اللي عشته مع ماما، والحقيقة اني مش عايزة أعيشه تاني مع اي حد عزيز أو غالي عليا، وكنت فاكرة اني خلاص أخدت نصيبي من المرض في كل اللي عيشته وشفته مع أمي بس اتضح انه كاتبلي غير كده واسرع مما كنت أتخيل أنا كنت بقول اكيد حيجيلي كانسر زي ماما بس ما تخيلتش انو يكون بدري كده وانا عندي ٤٣ سنة واديني عرفت بنفسي الاحساس ودوقت جلسات الكيماوي والاشعاعي كمان

 

أنا بكتب كل الرغي ده عشان أوصل للاحساس اللي عندي دلوقتي ان انا مش زعلانة ومش خايفة انا بس طالبة منه اللطف وانا قدها ان شاء الله، وزي أما كانت أمي بتعمل كانت بتستحمل وراضية وحمداه طول الوقت وقوية

أنا كمان هكون زيها

 

شعري وقع واملي المرة دي يطلع حلو بقه، دا انا صبرت عليه سنه ويا دوب أول اما اتحسن اخدت الكيمو ووقع

 

كله حيعدي ان شاء الله والمهم ان اي حد عنده المعركة دي أو الحرب دي يحاول يرفع من روحه المعنوية وربنا حيقويه ويقدره

 

يحاول يطنش على اي حاجة أو اي حد يزعله عشان اللي مزعلك مش حييجي يشيل عنك وجعك وألمك وبهدلة مرضك ولأن كمان مفيش حاجة في الدنيا مستاهلة

 

حاولوا تكونوا جنب اللي بيحبوكوا بجد وبيسعدوكم

 

أنا في الأول حبيت ان الموضوع ما يتعرفش وما قولتش لناس كتير من صحابي واهلي عشان ماكنتش عايزة حد يزعل أو يقلق أو حتى يشيل هم الخبر ده أو يبصلي بنظرة حزن أو شفقة... بعد الـ٨ شهور اللي فاتوا خلاص دلوقتي انا جاهزة اني اقول للدنيا كلها مش عشان مستنية حاجة.... بس عشان حاجة واحدة... وهي اني اكون مصدر قوة أو إلهام واني أأكد لكل الناس ان دي مش نهاية الدنيا وان عادي ده مرض زي اي مرض ممكن يصيبنا وفي ناس اتولدت بأمراض أو اعاقات وربنا قدرها انها تكون قوية وتبهرنا بإرادتها وقوتها.

 

وزي أما قالولي على ماما دي بتموت.. ده ما حصلش وربنا الحمد لله مد في عمرها

 

مفيش حد فينا عارف ربنا كاتب له إيه ولا حيعيش قد إيه عشان كده أنا بأكد لكم ان دي مش نهاية الدنيا وان طالما لسه فينا نفس لازم نبقى اقوياء ونحارب عشان اللي بنحبهم أو حتى عشان وقتنا لسه ما جاش

 

انا كان بقالي سنين كتيرررررررة ما عملتش فوتو سيشن وقررت ان ده الشكل اللي حعمل بيه الفوتو سيشن دي.... إني اكون من غير شعر عشان ده حالي وافكرني واقول لكل واحد أو واحدة بيمروا بالتجربة دي انتم مش لوحدكم ملايين بيتعرضوا لها يوميا وبجد دي مش اخر الدنيا

 

صحيح انا ما قدرتش انزل امشي في الشارع كده بس انا قادرة اتصور كده واحطها عندي وما اكونش مكسوفة أو متضايقة

وأحطها على كل الجروب اللي انا فيها عشان نشجع بعض اننا ما نزعلش ولا نكسف وان ييجي اليوم اللي نقدر نمشي في الشارع كده وما نشيلش هم الباروكة ونكون اقوياء وراضيين

 

محدش عارف ربنا شايله إيه دي فرصة ترتبوا اوراقكم وتعرفوا انتم عايزين ايه حقيقي وتحققوه وتعرفوا ايه اللي فعلا مستاهل ومين اللي عايزينه في حياتكم ومين اللي خلاص مش مهم يكمل معاكم...: دي مجرد فتره وحتعدي بكل حبايبكم واهلكم

 

وهنا لازم اشكر كل اللي ساندوني من اهلي واصحابي وزملائي اللي ادوني سبب اني اكون قوية بحبهم وجدعنتهم ووفائهم ومش حعرف اكتب اساميكم لانكم كتير بس حقيقي ادتوني سبب اني اكون قوية بلمتكم حواليا ربنا ما يوريني فيكم اي حاجة وحشة ويقدرني اني اكون ليكم زي ما كنتم ليا.

 

أنا عارفة انها صفحة وحقلبها وأكون مستعدة لقضائك يا رب وراضيه الحمد لله

 

ربنا يقوي ويشفي كل مريض يارب ويهونها عليه وعلي كل حبايبه

 

حقيقي انتم مهونين عليا كتير

 

ربنا يخليكم ليا ويسعدكم ويبارك لك

 

أنا بكتب الكلام ده وانا خلصت خلاص والحمد لله عدت واللي جاي احسن 

 

إن شاء الله

 

أما بقى حكمته فانا لسه ما عرفتهاش بس اكيد حعرفها واكيد حياتي حتتغير وان شاء الله للاحسن

 

أمانة لكل اللي عندي ويعرف جدتي من فضلكم محدش يقولها لأني ما قولتلهاش انا عايزاها دائما تكون مطمئنة علينا كلنا وربنا يديم عليها الصحة

 

الفوتو سيشن دي ما كنتش حقدر اعملها غير بحبايبي اللي ما اتأخروش عني وانا اكيد بشكركم من كل قلبي انكم ساعدتوني في اللي انا عايزة اعمله... بشكركم على جدعنتكم وعلي وقتكم".

 

تابع بوابة روزا اليوسف علي
جوجل نيوز