خيبة شوبير!

بقلم : ياسر صادق

و النبي ما شفت اخيب منك ! لما تجمع 7 و لا 8 اشخاص و تروحوا تلعبوا كورة في الشارع امام السفارة الاسرائيلية علشان اقامة بطولة الامم الاوروبية تحت 21 سنة في اسرائيل ..ايه بقي اللي حصل بعد ما سيادتك لعبت كورة؟!هل قام الاتحاد الدولي التي اسرائيل عضو فيه بسحب البطولة منهم و لا شطب اسرائيل من عضويته! و هل اسرائيل ركعت لما سيادتك رحت امام السفارة و اعتذرت عن تنظيم البطولة ؟!

لذلك لم يكن غريبا ان يصف الغرب العرب بأنهم ظاهرة صوتية !كل الذي يعملوه هو الكلام لا اكثر و لا اقل ونظل نشجب ونندد و نستنكر ونعقد الاجتماعات التي لا طائل منها علشان الشو الاعلامي دون تنفيذ أي شئ علي ارض الواقع ..ونشكل لجان تنتهي الي لا شئ ..

و في المقابل فان العدو الصهيوني يوجه لنا الضربات و اللكمات الواحدة تلو الاخري ..تضرب السودان و السودان تقول نحتفظ بحق الرد..ثم تضرب سوريا و سوريا تقول نحتفظ بحق الرد وبشار يقوم بزيادة التنكيل في شعبه ..فتح و حماس نازلين تقطيع في بعض بدل ما يوحدوا جهودهم ..و في نفس الوقت اسرائيل نازلة بناء في المستوطنات و الاستيلاء علي الاراضي وتعمل مخطط من 30 سنة في اثيوبيا قامت خلالها ببناء مستشفيات و مدارس و مشاريع استثمارية ..ليه؟! لانها تخطط لبعيد ل 50 سنة قادمة ..لكيفية قطع المياه عن مصر و خنقها ..و تقسم السودان شمالا وجنوبا..و ايه بقي اللي بنعمله بنتكلم و نلعن و نتفرج و نتخانق مع بعض و نلعب كورة امام السفارة شفتم خيبة اكتر من كده!..  يقول المولي عز وجل "ان الله لا يغير ما بقوم حتي يغيروا ما بأنفسهم"..

يا كابتن هو انت مش عارف العلاقة التجارية لن اقول بين مصر وحدها و لكن بين العرب جميعا و اسرائيل و رجال الاعمال المصريين و العرب الذين يذهبون و يعودوا من و الي هناك واذا قلت لهم اتبرعوا لصالح القضية الفلسطينية و ضحايا الاحتلال الاسرائيلي يتهربون منك..

يا كابتن ده احنا مش عارفين نجيب حق ال 16 جندي الذين استشهدوا في رمضان الماضي و مش عارفين نسيطر علي سيناء سيطرة كاملة..يا كابتن خليك في الكورة علشان العملية مش ناقصة و النبي!