تمثيلية حسن حمدي الفاشلة!

بقلم : ياسر صادق

تمثيلية فاشلة اوي التي قام بها النادي الاهلي او حسن حمدي تحديدا عندما باع حقوق مبارياته التسعة في الدوري العام لشركة "فيوتشر" والتي يملك حسن حمدي فيها اسهم.. ثم تقوم قناة سي بي سي باذاعة المباريات و التي حسن حمدي عضو منتدب بها ..و تذكرت عندما قام حسن حمدي بتوقيع حقوق الرعاية بين وكالة الاهرام للاعلان و النادي الاهلي و هو رئيسا للاثنين ليعرض ما يعرضه و يقبل ما يقبله!.. وطالما الحكاية كده زيتها في دقيقها فايه المشكلة لما يخرجوا علينا و يقولوا المباريات التسعة بالاضافة الي لقائي الفريق ببطولة اندية افريقيا لابطال الدوري بدوري ال 32 و ال 16 قد تم بيعهم بمبلغ 41 مليون جنيه! ..يا صلاة النبي احسن يعني المباراة ب 3 مليون و700 الف جنيه يعني مباراة للاهلي مع فريق زي الرجاء الصاعد من القسم الثاني و بدون جمهور تسوي 3 مليون و 700 الف او المنيا او القناة او فرق مجهولة في افريقيا لا احد يعرف عنهم شيئا تبقي بالمبلغ ده..انتم شايفينا مجانين للدرجة دي ..طيب عايزين تكدبوا احترموا عقولنا شوية ..اذا كان الاهلي باع مبارياته في الدوري كلها الموسم الماضي ب 3 مليون جنيه ..الكدبة وسعت منك شوية يا عم حسن..و خلي بالك المطبلاتية بتوعك من عينة الافندي شوبير اللي داير علي كل القنوات يطبل و يزمر مش عارفين يقنعونا ..وكمان يخلي "شلته" حسن مصطفي  رئيس الاتحاد الدولي لكرة اليد يشنوا هجوما علي وزير الرياضة طاهر ابو زيد و معه خالد زين رئيس اللجنة الاوليمبية و المعادي لابو زيد و غيرهم من المستفيدين..ما هو لو الكابتن طاهر اخذ موقف رجولة و رفض التمديد لمجلس حمدي حتي موعد الانتخابات لكان الوضع اختلف تماما زي ما عمل مع الزمالك لكن طاهر خايف علي شعبيته في الاهلي علشان بيفكر يدخل الانتخابات فيها بعد خروجه من الوزارة ..وطبعا حسن حمدي عارف ان التليفزيون عمره ما يعطيهم شارة البث  و علشان كده ايه المانع لما يبيعوا الدوري ب 41 مليون و لا حتي ب 41 مليار ما هو الكلام ليس عليه جمرك..لا ده كمان ايه النادي الاهلي وافق و تعطف و تنازل و قال التليفزيون يذيع ارضي ..و ممكن نخليه يذيع فضائي مقابل قناة الاهلي تذيع مباراته مع انبي ايه يا عم الكرم ده!..الاهلي عايز اما يمشي الناس علي مزاجه و يرضخ الجميع له و علي رأي عصام الامير رئيس اتحاد الاذاعة و التليفزيون الاهلي عايز يبقي دولة داخل الدولة و اما يقلب الترابيزة علي الكل او بمنطق فيها يا أخفيها و يهدد و يتوعد بالشكوي هنا و هناك ..طيب يا عم أهو التليفزيون ذاع مباراة الاهلي و انبي علي قناته وفق تعاقده مع اتحاد الكرة و لم يعطي الشارة لقناة الاهلي ..الحكاية مش فتونة يا كابتن حسن ده انت مجلس تيسير اعمال يعني مش من حقك تتعاقد مع حد.. انت يدوبك تصرف المرتبات للعاملين بالنادي حتي موعد الانتخابات في شهر مارس..!