عاجل.. نص مداخلة الرئيس السيسي لـ"الطفل المعجزة" مع "شريف عامر"

أجرى الرئيس عبد الفتاح السيسي، مداخلة هاتفية ببرنامج "يحدث في مصر"،   على فضائية "إم بي سي مصر"، مع الإعلامي شريف عامر، وتقدم "بوابة روزاليوسف"، نص مداخلة الرئيس السيسي، مع الطفل المعجزة، أحمد تامر:

الإعلامي شريف منير لضيفه الطفل أحمد تامر حافظ وقارئ القرآن الكريم: السيد رئيس الجمهورية غالبًا كان بيشوفك، ومعنا الآن على التليفون.

مساء الخير يا فندم

 الرئيس السيسي:  "أهلًا وسهلًا السلام عليكم.. أزيك يا أستاذ شريف، وتحياتي للأستاذ الدكتور مبروك عطية"

الدكتور مبروك عطية: "وعليكم السلام ورحمة الله وبركاته

الرئيس عبدالفتاح السيسي:

وتحياتي كمان لابننا أحمد، بسم الله ما شاء الله لا قوة إلا بالله، ربنا يا رب يحفظك يابني ويخليك لأهلك ويحميك من كل شر وسوء، اسمحلي يا أستاذ شريف أن أهنيك، ومكنش ممكن يعدي عليا إني أشوف النموذج الجميل والرائع ده ومتكلمش.. ربنا يحفظه".

شريف عامر: الحمد لله مصر فيها كل حاجة إذا كان عندنا مشاكل ففيه عندنا نماذج مثل أحمد الذي نعرفه جميعًا.

الرئيس: "اسمحلي أن أسجل تقديري مرة تانية على السعة والتنوع الكبير في تناولك في برنامجك والقضايا اللي بيتم استداعاؤها ومناقشاتها والنماذج اللي بتجبها".

شريف عامر: أشكرك يا فندم هذا واجبي 

الرئيس: "اسمحلي أن أوجه الكلام لأحمد وأقوله يا أحمد بسم الله ما شاء الله عليك ربنا يحفظك وربنا يكملك بخير ويحميك وبهني أيضًا والدك ووالدتك.. أنت عارف يا أحمد يا تامر أنت حافظ إيه؟ كلام ربنا سبحانه وتعالى أعز وأفضل وأكرم وأطيب كلام.. البركة كلها معاك.. ربنا يابني يحميك، وخليني أقولك على حاجة، الحفظ جميل ومهم، ولكن الفهم كمان جميل ومهم، وأنا يمكن حبيت أعمل مداخلة عشان كل من بيسمعنا دلوقتي يعرف أننا صحيح دلوقتي محتاجين نهتم باللغة العربية ونهتم بحفظ القرآن، ونهتم أيضًا بتنظيم أوقات أولادنا، كان فيه نقطة مهمة أسجلها هنا،  مهم أوى إن الأسر تبقى منتبهة لأبنائها وبناتها وتشوف النقاط اللي ممكن يتفوقوا فيها مش فقط قدرة قوية على الحفظ زي أحمد، فيه حاجات تانية كتير وكلها نعم من ربنا ممكن تكون أنشطة رياضية، وممكن تكون أنشطة وملكات أخرى موجودة لو نميناها واهتمينا بيها هنجد برضه أن النبت الجميل بيكبر ونبقى فرحانين بيه كلنا".

الحفظ وحده بدون فهم مش كفاية 

الرئيس: "بقول لأحمد ولمن يسمعنا من المصريين، وغيرهم، مهم قوي تفهم، احفظ بس افهم، الفهم مش هقول أهم من الحفظ، لكن أقول الحفظ وحده مش كفاية، الفهم الفهم الفهم، معه لا يستطيع أحد أن يلوي عنق النصوص ويزيف العقائد إذا كان فيه فهم".

يا أحمد يا تامر سامعني؟

شريف عامر: سامع بس "مخضوض"

الرئيس: لا متتخضش أنا زي جدك 

وأضاف الرئيس: "عاوز أقول للأسر، أحمد بيقول أنه لا يمسك بالموبايل أكثر من ساعة في اليوم ولا يلعب في الشارع، بالفعل عندما نجد لدينا موهبة لن نستطيع تنميتها، وهي تعيش حياتها بالطريق التي نعيشها، فيها كل شيء متاح ومُباح، " انا بدعوك في أول افتتاح تيجي تقرأ لنا ما تيسر من القرآن في أول افتتاح، أستأذن الوالد واسرتك انك تبقى في اول افتتاح لينا، الشيخ بتاعنا تقرالنا ما تيسر من القرآن فاسمحلي ادعوك تكون معانا لتحل البركة بفضل الله سبحانه وتعالى".

"الحاجة التانية أنا سعيد بالدكتور مبروك عطية وبتناوله للقضايا المختلفة ومش هقول ملحوظة لأن العلماء الأجلاء ميتقالهمش ملحوظات، ولكن اللي بيسمعنا ثقافات وأفكار مختلفة ومتنوعة كتير فمش كل الناس هتستقبل الكلام بنفس الفهم اللي بيبقى مقصود من اللي أنت طارحه".

الدكتور مبروك عطية: نعم، صحيح 

الرئيس:  "عايز المتحدث يراعي إن كل اللي بيسمعه مش زي بعضهم وأفكار مختلفة، ولكن تقديري لك وللأستاذ شريف، وأنا سعيد أوي بالبرنامج".

الدكتور مبروك: أكيد 

شريف عامر: ساتنازل عن فضولي الصحفي في طرح الأسئلة ويكفيني ذلك 

الرئيس: يا أستاذ شريف أنا بقدر جدا الإعلام وهذا المجال العظيم، متابعًا أوعى تتصور أن اللي بيعمل في هذا المجال ملوش أجر، لا ليه أجر كبير جدًا جدًا، والدكتور مبروك معك ويعلم أن يظل المرأ يصدق..".

الدكتور مبروك: حتي يُكتب عندالله صديقا

الرئيس:

تعرف قد إيه إن الإعلامي المخلص لرسالته له أجر كبير أوي وكل من هيسمعك وكل من سمع أحمد وهو بيقرأ ليه أجر أحمد وأسرته وأنت ليك أجر ولا ينقص ذلك من أجر حد، لأن الغالب يدي الكل".

وأضاف الرئيس: " التناول الإعلامي لأي قضية إذا تم تحري الصدق فيها، وذلك من خلال القراءة والتوسع في تفاصيلها حتى الوصول للصدق، وتحرى الصدق لكل اللي يسمعك هتاخد أجر، عشان كده بتكلم أن الوعي قضية القضايا في مجتمعاتنا، بتشوف في الدنيا كلها الاقتتال والجهل الموجود آذينا كلنا، فتقديري لك وللبرنامج وتقديري للدكتور مبروك عطية ولأحمد تامر ولأسرته الطيبة وزي ما بقوله الدعوة ليك في الافتتاح الجاي تيجي تشرفنا ونسعد بيك وتقرأ لنا عشان البركة تبقى موجودة معانا بفضل الله سبحانه وتعالى.

وتابع الرئيس : "عايز حاجة يا أحمد؟ 

أحمد: الله يخليك، وبدوره

 رد الرئيس: ويخليك يا أحمد، أنا بكلمك لا تحرج  مني متتكسفش يا ابني".

   شريف عامر: شكرًا جزيلا لحضرتك، وقتك مهم وثمين وفيه حاجات كتير ووجودك معانا على الهواء شرف ومتابعة حضرتك لينا شرف، ومصر فيها كل حاجة وعلينا أن نتعامل مع كل حاجة، وأننا نحاول ونسعى نتحرى الصدق والدقة".

الرئيس: "ربنا يوفقك يا أستاذ شريف، ودايما معاك الخير كله ويعينك على الرسالة المهمة وتؤجر عليها أجر طيب إن شاء الله".

الإعلامي شريف عامر: فيه طلب من حضرتك

الرئيس: تفضل شريف عامر: نأمل أن تستمر حضرتك في مشاهدة باقي الحلقة، وذلك نموذجين بعد الفاصل سجلوا أرقامًا رائعة في حب القراءة.

الرئيس: يسعدني حاضر .