لبني المصري تكتب : "الست دي بميت راجل"
ديما بنسمع الجملة دي بتتقال علي الست القوية كنوع من انواع البرهنة علي قوتها !
و يمكن تكون دي الحقيقة اللي ظاهرلنا فعلا ؛ الراجل يعني السند....يعني الحيطة اللي بتتحامي فيها....يعني الأيد اللي بتمسكك قبل ما تقعي !
الراجل هو اللي بيستحمل مهما حصل ! هو اللي عنيه مبتدمعش غير في الشديد القوي !
لكن الست.....الست هي الكائن الضعيف الرقيق......الست هي اللي ديما بتدور علي سند.....ديما محتاجة حد يحتويها.....الست هي اللي ممكن تبكي و تنهار قصاد الناس.....هي اللي لو خسرت الحيطة اللي مسنودة عليها بتحس قد ايه هي مكسورة و فاضية من جواها !
يمكن تكون هي دي الصورة اللي كلنا كبرنا عليها !
الست ست و الراجل راجل !
الراجل هو القوة و الست هي الضعف !
كبرنا و احنا مقتنعين ان الصورة دي هي الحقيقة ! و اننا كستات و بنات ضعاف بجد و عمرنا ما نقدر نبقي بقوة راجل !
بس الحقيقة بقي ان تعريف القوة هتلاقيه ديما ادق في حياة الستات و البنات !
و يمكن القوة اللي بتكلم عليها هنا هي مش قوة جسدية قد ما هي قوة نفسية ! القوة اللي من جواها اللي مفيش راجل يقدر ينافسها فيها !
القوة دي هي الأم اللي شايلة حمل البيت كله علي اكتافها.....شايلة هم ولادها و جوزها و نفسها.....و يمكن بتعيش عمرها كله و هي مثل اعلي و مثل قوي لاولادها مهما كان الحمل تقيل عليها !
القوة دي هتلاقيها في البنت اللي قلبها اتكسر بما فيه الكفاية و لسة عندها القدرة انها تدي اللي حواليها و متستناش مقابل !
القوة هتلاقيها في البنت اللي قدرت تواجه كل اللي مخوفها.....اللي بتتحمل نتيجة قرارتها مهما كانت النتيجة بتوجع !
القوة هتلاقيها في كل بنت كان عندها الاختيار انها تقع و تتكسر و تفضل منهارة في اوضتها بس قررت ان مفيش حاجة هتكسرها و قامت و كملت حياتها !
القوة هي كل بنت قدرت تشيل فوق طاقتها و كل مرة الحمل كان بيتقل عليها عمرها ما اختارت انها ترمي الحمل ده !
لو فكرت كويس هتلاقي ان قدرة الست علي العطاء و التحمل و التماسك في اسوأ اللحظات رغم انها بطبيعتها حساسة ده اكبر دليل علي قوتها !
الست هي اللي مهما كانت مكسورة بتقدر تبين عكس اللي جواها ! الست هي اللي كتر الوجع بيخليها قوية قوة محدش فاهمها ! هي اللي ممكن تكون بتعيط بليل و تصحي الصبح ولا كأن حصل حاجة !
يمكن محدش هيقدر يفهم تركيبة الست و القوة اللي جواها مهما حاول......بس الحاجة الأكيد هي ان الراجل و الست الاتنين اقويا بس كل واحد فيهم قوي بطريقته !
عشان كده مفيش حاجة اسمها الست بميت راجل.....الست مش محتاجة نشبهها بحاجة عشان نثبت انها قوية.....الست قوتها بتثبت نفسها في كل لحظة في حياتنا !