المخرج محمد سامي: مافيش Number 1 في الإخراج

ضمن فعاليات الدورة الرابعة من مهرجان البحر الأحمر السينمائي الدولي عقدت مساء أمس جلسة حوارية مع المخرج محمد سامي، حيث تحدث عن دور الإخراج في نجاح المسلسلات التليفزيونية ودور الأبطال، ومساهمتهم الحقيقية، والعلاقة بين المخرج وممثله، ومتى يكون المخرج هو المؤلف نفسه.

 

 

وعن كواليس دخوله عالم الإخراج التليفزيوني قال محمد سامي: "لما حصلي عرض إني أعمل مسلسل "آدم" كنت في الوقت دا مخرج كليبات مكنتش لسه أخرجت سينما أو تليفزيون، كنت بحضر لفيلمي الأول، وتامر حسني عرض عليا مسلسل آدم وكانت المسلسلات في الوقت دا بتتعمل بطريقة أقدم من اللي بنشتغل بيها دلوقتي، كان في دراما عظيمة طبعا ولكن كان في الوقت دا شكل التصوير كلاسيكي وكاميرات قديمة".

 

وتابع محمد سامي: "في سنة 2005 نزل مسلسل prison break وفي 2008 نزل مسلسل breaking bad وكنت متأثر بيهم جدا وفي سنة 2007 نزلت كاميرات ديجيتال جديدة، اقترحت أن ليه منصوروش بالشكل الجديد والمنتج مكنش مرحب بالفكرة ومعجبوش وقالي الدراما التليفزيونية عايزة شكل كلاسيكي عشان منخرجهاش برا إطارها فالناس تقفل منها ومتتفرجش عليها، ساعات بعض الأشخاص في الوقت دا شايفين أنهم بيتكلموا صح لكن الكلام دا أنا مكنتش موافق عليه وشايف أنه غلط مع كامل احترامي للمنتج اللي قال دا، اقنعت تامر حسني".

 

أكد المخرج محمد سامي أنه لا يحب أن يطلق عليه لقب المخرج رقم "1" بعد النجاحات التي قدمها الفترة الماضية في الدراما التليفزيونية.

 

وقال محمد سامي إنه وكل المخرجين يحاولون تقديم أفضل ما عندهم من أجل الجمهور.

 

وعن سبب كتابته لأعماله وعدم الاكتفاء بدور المخرج فقط، قال  "لأن بلاقي كتاب السيناريو بقعد اكتب لهم وأعدل لهم وأضيف لهم وفي الآخر يعترضوا، وكمان بيخافوا يتقال عليهم المخرج كتب لهم بيبقى عندهم عدم ثقة".

وحكى سامي عن ذكرياته عن مشروع لم يتم بينه وبين الكاتب الراحل وحيد حامد، وقال كان فيه فيلم مكانش لينا حظ يطلع للنور اشتغلته أنا وأستاذي وحيد حامد، وفرق في حياتي ككاتب، وكمان تجربتي مع الكاتب أحمد محمود أبو زيد اللي كتب قصة رائعة هي مسلسل آدم واستفدت منه، لأنه فاهم يعني إيه مخرج ويعني إيه يشتغل معاه على التطوير، لكن فيه مؤلفين ابقى أنا اللي عامل الفكرة وكاتب الحوار والسيناريو ويبقى هو اللي معترض، وبيخاف قدام الناس إنه يقول المخرج ألف له ودي مشكلة كبيرة".وعاد سامي ليؤكد أن الوسط الفني به الكثير من المؤلفين المهمين جدا "مش دايما عندي حظ اني أتعاون معاهم". وعن قصة العمل الذي كاد يجمعه والسيناريست الكبير وحيد حامد، قال "جالي سيناريو مكتوب عليه وحيد حامد عيطت، وأنا ومي قعدنا نرقص بالمخدات في البيت، وقعدت أقول هعمل فيلم لوحيد حامد، ورحت قعدت معاه ولمدة نص ساعة متكلمش، هو كان مش شخص عادي على كل المستويات، مش هيتكرر الله يرحمه".وتابع سامي "بعد نص ساعة قالي انت شفت الفيلم إزاي، وكنت عايز ابهره وفتحت الكتب كلها، فقالي: (انت مجعلص الموضوع ليه كده، أهم حاجة في الفيلم تحسه عشان الناس تصدقه)

جدير بالذكر أن مهرجان البحر السينمائي افتتح فعاليات دورته الرابعة مساء الخميس الموافق 5 ديسمبر، بحضور كوكبة من نجوم الفن، بينهم: ويل سميث، يسرا، مايكل دوجلاس، ليلى علوي، كاثرين زيتا جونز، نادية الجندي، نبيلة عبيد، كارينا كابور، عامر خان، سبايك لي، يسرا اللوزي، حسن الرداد، إيمي سمير غانم، ماجدة زكي، منى زكي، أحمد حلمي.