يسرا تروي قصة 25 فيلمًا لها منعت من العرض

قالت الفنانة يسرا: "أنا اتحاربت خلال مشواري الفني وكان بيبقى فيه صراعات غير عادية وأنا ما كنتش قدهم فتعرضت لانهزامات، ما كنتش قد الخبط لأني ضعيفة، قعدت 4 سنين عملت فيهم  25 فيلما ما نزلوش ولم يعرض أي واحد منهم، وكانوا بيلقبوني بالنجمة المعلبة".

 

وتابعت يسرا خلال لقائها ببرنامج "بيت السعد" الذي يقدمه المطرب أحمد سعد والممثل عمرو سعد، وقالت: "لما ابتديت تمثيل في أول سنة عملت 6 أفلام وتاني سنة 5 أفلام، وكنت أنتظر يتعرضوا ما كانوش بيتعرضوا، وفي منها اتعرض متأخر و90% منها منجحوش".

 

وأضافت: "بقيت أشوف الناس كتبوا عني إيه وقرأت كل ما كتبه النقاد الكبار عني، ولقيتهم بيتكلموا عني كويس وعرفت إن الغلط في فشل الفيلم نفسه ممكن يبقى له علاقة بالتوقيت أو اختيار المواضيع أو توظيف الممثل في الدور".  

 

كما أشارت يسرا لأهمية دور المخرج في نجاح العمل، وقالت: "لما بتشتغل مع مخرج كبير بيخليك كبير لأنه بيحبك ولو حبك تشتغل معاه عمياني ولو ما كانش فيه أمان مع المخرج ده أكبر حاجة، وده درس اتعلمت ومشيت عليه".