ريتاج جمال: نفسي أكون دكتورة أعالج الأطفال اللي زيي من "قادرون باختلاف"
شريف مدحت - تصوير محمد أبو النجا
ريتاج جمال محمود إحدى بطلات "قادرون باختلاف"، الذين تم تكريمهم مؤخرا من الرئيس السيسي، وقد حرصت بوابة روزاليوسف على الذهاب لها وزيارتها في منزلها، لتكشف لنا تفاصيل الحوار الذي دار بينها وبين الرئيس السيسي في الحفل، والكثير عن حياتها الشخصية، وإلى تفاصيل الحوار
ربما يعجبك
- عندك كام سنة؟
عندي 12 سنة.
- عندك اخوات؟
عندي 4 إخوات هم آية وغيداء وفرح وناصر.
- فيهم حد من «قادرون باختلاف»؟
لا، الحمد لله.
- احكِ لنا بتقضي يومك إزاي؟
أصحا وأغسل وشي وألبس وأروّق مع ماما وإخواتي البيت وأذاكر شوية، وممكن أنام شوية وأصحا ألبس وأنزل التمرين.
- أنت في سنة كام الآن ونفسك تكوني إيه في المستقبل؟
أنا في الصف السادس الابتدائي، ونفسي لما أكبر أبقى دكتورة، عشان أعالج الأطفال اللي زيي من "قادرون باختلاف".
- كيف تفوقتِ في الدراسة وفي الرياضة وصنعتِ بطولاتك؟
بتنظيم الوقت بين التمرين والدراسة، عشان مفيش حاجة منهم تأثر على الثانية.
- ما دور ماما في حياتك؟
بتروح معايا التمرين في النادي، وبتعمل كل حاجة عشان تخليني مبسوطة وسعيدة.
- تقولي إيه لبابا؟
بحبك قوي عشان أنت بتجيب لي كل حاجة أنا عاوزاها ومش مخليني عاوزة حاجة .
- تقولي إيه للقادرين باختلاف اللي زيك؟
لازم يروحوا التدريب ويلعبوا الرياضة اللي بيحبوها.
- هل تعرضتِ في يوم لتنمر.. يعني حد بيضايقك؟
في المدرسة الأطفال ساعات بيضايقوني وبيشدوني من إيدي ومن رجلي، وأنا بقولهم سيبوني أنا مش لعبة تلعبوا بيها.
- كيف تم اختيارك لاحتفالية «قادرون باختلاف»؟
الاتحاد المصري لـ"قادرون باختلاف" برئاسة الدكتورة أمل مبدي، قام بعمل اختبارات واختاروني عشان أنا بعمل استعراضات.
- إيه رأيك في اهتمام الرئيس بـ"قادرون باختلاف"؟
الرئيس السيسي بيهتم جدًا بينا، وبيعاملنا زي أبنائه.
- إيه اللي قلتيه للرئيس وقالك إيه؟
قلت له حضرتك مبسوط وحضرتك قاعد معانا ورد عليا وقالي إن أسعد وقت بقضيه وأنا قاعد في وسطكم وشايف الفرحة في عينيكم، وكمان أهداني "تاب" هدية وفرحانة بيه قوي، وبتصور بيه كل يوم، وباخده جنبي على السرير وأنا نايمة هو والعروسة بتاعتي.
- إيه السؤال اللي كنتِ حابة تسأليه ونسيتيه؟
كنت عاوزة أقوله نفسي أخف وأكبر زي الأطفال اللي في سني.
- هل نظرة الناس تغيرت لك بعد ما سألتِ الرئيس وتصورتِ معه؟
طبعًا والناس كلها بقت تيجي وتقولي ممكن أتصور معاكي، وحاسة إن أنا بقيت مشهورة.
- تقولي إيه لبوابة روزاليوسف؟
شكرا ليكم وبحبكم قوي .
- حدثينا عن جولتك وزيارتك للكلية الحربية؟
رُحت مع أصحابي الكلية الحربية، وركبت الطيارة، وركبت الدبابة، وكمان مدير الكلية وعدني أنا وأصحابي إن لينا زيارة للكلية الحربية كل 6 شهور.
- زرتِ الكلية الحربية وركبتِ الطائرة.. احكي لنا شعورك إيه أنت وأصحابك؟
كنا فرحانين قوي.
- تحبي تقولي إيه للرئيس السيسي؟
بحبك قوي يا سيادة الرئيس، وشكرا ليك وربنا يخليك لينا يا رب.
- مبسوطة إن الرئيس بيكون سعيد وهو معكم؟
طبعا مبسوطة قوي، ونفسي الاتحاد يختارني تاني عشان أروح الحفلة وأقابل سيادة الرئيس تاني.
- ما هوايتك المفضلة بعيدا عن ممارسة الرياضة؟
أعمل استعراضات وأغني وأمثل أحيانًا.
- كيف دخلتِ مجال الرياضة؟
ماما وبابا أخدوني وروحنا النادي وعجبتني لعبة السباحة والجري فقررت أمارسها.
- من الذي اختار الرياضة لكِ؟
أنا اللي اخترت وبابا وماما نفذوا رغبتي، عشان أكون مبسوطة وفرحانة.
- ما أبرز الإنجازات التي حققتها طوال مشوارك مع اللعبة؟
حققت ميدالية ذهبية وميدالية برونزية ببطولة الجمهورية، وسبقت كل أصحابي أنا جريت بسرعة وسبقتهم كلهم.
- ما حلمك وطموحك القادم؟
عاوزة أشارك في بطولات عالم وأجيب ميدالية لمصر.
- ماذا عن حلم الميدالية البارالمبية؟
نفسي طبعا أشارك في باريس 2024 البارالمبية وأجيب ميدالية فيها كمان.
جوجل نيوز
