حلا شيحة: الكلام عن أجري الكبير في الفيلم ضحكني

خرجت الفنانة حلا شيحة برسالة جديدة إلى جمهورها، لكشف المزيد من التفاصيل حول أزمتها الأخيرة في فيلم "مش أنا"، مع الفنان تامر حسني.

 

 

واستهلت حلا شيحة رسالتها، بقولها: "حابة أشكر كل الناس الجميلة على رسايلهم الجميلة المشجعة"، مضيفة: "وحابة أشكر كل الصحافة اللي نشرت فتوى دار الإفتاء النهارده اللي موقفي هو نفس موقفها اللي بيوضح إن التمثيل والفن عموما زي أي مهنة في الدنيا حلاله حلال وحرامه حرام.. وأنا لا أحب أن أكون جزءا من أي نوع من التطرف، سواء باسم الدين أو باسم الفن.. ولو نقابة المهن التمثيلية ترفض موقف دار الإفتاء الواضح فهنيئًا لي بشطبها لعضويتي".

وتابعت: "حبي للفن محدش يقدر ينكره ولا يزايد عليه.. أنا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع أصلًا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ".

وأضافت: "بالنسبة للكلام غير اللائق عن الأجر.. كل اللي في المجال شاهدين إني كنت أعتذر عن عدد كبير من الأعمال الفنية، وكنت باقبل أجور أقل مما يتناسب معي تعاونا مع صناع العمل.. وأصلًا ما استلمتش الجزء الأخير من أجري في الفيلم لما أتأخر نزوله جدًا وبدأت أتغير وأصلّح.. لأن بصراحة الكلام عن (أجر كبير) ضحكني".

واختتمت حديثها قائلة: "أنا فنانة بطبعي ومن صغري وكل اللي يعرفوني عارفين حبي للفن.. ودايمًا هعبر عن نفسي بمواهبي الفنية لما أحب، لكن الجديد إني مش هاعمل كده على حساب اللي أنا مؤمنة بيه بجد جوايا زي ما قلت مؤخرًا.. أنا لا أهاجم أحدًا و لا أحارب أحدًا ولا أنا أفضل من أحد ولا أنصح أحدًا قبل ما أنصح نفسي أولًا، وكلنا نخطئ مفيش حد معصوم من الخطأ.. وبتمنى الخير دايمًا لكل الناس بمن فيهم كل زمايلي وصناع العمل".