ماذا قال الرئيس لسائقة التروسيكل وكيف كافأها؟ .. إليك التفاصيل
كتبت - رفيدة عوضين
"مروة العبد"، سائقة تروسكل من محافظة الأقصر، نموذج مشرف في الكفاح والإصرار على النجاح، التي وصفها الرئيس عبد الفتاح السيسي، بأنها "مثل جميل كلنا بنتعلم منه"، وذلك في استقباله لها اليوم في قصر الإتحادية، تكريمًا وتقديرًا له لدورها العظيم الذي تقوم به.
وأجرى الرئيس عبد الفتاح السيسي، حوارًا مع سائقة التروسكل، ونشره الصفحة الرسمية للمتحدث الرئاسي السفير بسام راضي، والذي جاء كالتالي:
الرئيس: بتشرف بيكي وبتشرف إني شوفتك
مروة: الله يباركلك.. ده شرف ليا والله وربنا يحفظك
الرئيس: الشرف ليا انا
مروة: لا الشرف ليا كبير وكان نفسي إني أشوفك والحمد لله ربنا كرمني
الرئيس: انا اللي ربنا كرمني بصحيح.. انتي مثل جميل كلنا بنتعلم منه وربنا يديلك الصحة
مروة: البركة فيك انت..انت اللي علمتنا.. انا من 12 سنة وانا شغالة.. كنت بروح المدارس وبعدين لقيت الظروف في البيت مش كويسة فاضطريت اشتغل..اشتغلت ف فرن وبعدين في قهوة وبعدين في البناء وبعدين رجعت الفرن تاني.. وبعدين جارنا جابلي التروسيكل وفضلت شغالة عليه.
الرئيس: اللي انتي عملتيه ده حاجة عظيمة أوي.. وانتي أكيد عارفة انتي بتعملي ايه وبتشوفيها في عيون الناس في الشارع وجيرانك وحبايبك
مروة: والله يا فندم انت اللي علمتنا
الرئيس: فيه ناس كتيرة هوجهلهم كلام من خلال كلامي معاكي..وبقولهم إننا بنقدركم ونحترمكم ونشكركم وإحنا سعداء جدًا باللي بتعملوه وده كله من كرم أخلاقك.. وده مثل عظيم وإن شاء الله في مؤتمر الشباب اللي جاي اسمحيلي إنك تكوني ضيفتنا وضيفة مصر.. وأسمحي إنك تكلمي الناس عن تجربتك.
مروة: انا مادام قابلتك أي حاجة هتقول عليها هعملها
الرئيس: ربنا يحفظك ويراضيكي.. الرسالة هنا إن مفيش استسلات ومفيش غضب من الظروف.. بالعكس المواجعة والحرص على العمل والنجاح والتغلب على قسوة الظروف.. وربنا ف يوم بيورينا إن الإنسان اللي بيبذل ويتغلب على الظروف والعوامل اللي بتقابله.. وانتي سعيني إنك تساعدي وتقفي جنب اسرتك ووالدتك وإخواتك اللي بيتجوزوا.
مروة: كلامك صح بس انت اللي علمتنا كدة
الرئيس: ده من طيب أخلاقك وكرمك.. لكن ده أمر عظيم جدًا وربنا هيكافئك في الدنيا وهيكافئك بيه في الآخرة.. ده زي العبادة كدة إنك طول النهار تعبدي ربنا في نفسك وأسرتك وتدي المثل الجميل للناس وتوري الناس الموجودة في الشارع إن بنتنا مروة _ما شاء الله ولا قوة إلا بالله_ بتقوم بدور عظيم وتنجح.
الرئيس: إحنا نقدر نعمل إيه ؟؟
مروة: هرجع وأقولك إحنا اتعلمنا منك والله
الرئيس: الصعايدة ناس كرماء وفضلاء وأهل الأقصر ناس طيبين جدًا.. فانتي عشان كدة بتقولي الكلام ده.. لكن نقدر نعملك إيه ؟.
مروة: مادام شوفتك والله خلاص انا فرحانه موت
الرئيس: انا زي والدك بالظبط
مروة: أه والله انت أبويا
الرئيس: وأنا يشرفني.. خلينا نطمن الأول إن يبقى فيه بيت كويس لمروة وأهلها إن شاء الله.
الرئيس: إنتي جوزتي مع الواد اختين؟
مروة: اه جوز فاطمة وزينب وفاضل الصغيرة وإن شاء الله أجوزها.
الرئيس: مفيش ولاد؟
مروة: لا إحنا أربع بنات إخوات
الرئيس: مخطوبة ؟
مروة: اه
الرئيس: عقبالك إن شاء الله.. وبقول للأقصر ولكل شاب أنه ياخد إنسانة زي مروة كدة تربي ولاده وتعيشه وتكافح معاه إنتي عظيمة.. فيه ناس كتير زيك يا مروة موجودين في البلد "بنات وسيدات وشباب" وبيعملوا كدة ويكافحوا.. مش كلهم أعرفهم لكن من خلالك أقولهم كفاية إنك ليكم مكانة كبيرة في بلدكم وبتتغلبوا على الظروف الصعبة والحياة القاسية ومتهزمتوش ومستسلمتوش للظروف دي وقولتوا هنعمل إيه ومشيتوا في طريق ممكن يكون صعب وقاسي
مروة: لازم الواحد يتعلم
الرئيس: ونعم الناس.. انتي مش مقدرة قد إيه المعنى اللي قدمتيه وبتقديمه للناس.. مرة تانية برحب بيكي وسعدت إنك جيتي مصر وشوفتك وتحياتي ليكي ولأسرتك وللقرية وللأقصر كلها والصعيد كله من خلالك لإنك تشرفي أي حد
مروة: أنا اللي اتشرفت إني قابلتك وسلمت عليك.. مش مصدقة نفسي والله.