"الخطيب" يصدر بيانًا للاحتفال بذكرى مرور 111 عامًا على تأسيس النادي الأهلي

كتب - محمد يوسف

أصدر محمود الخطيب؛ رئيس النادي الأهلي المصري، اليوم الثلاثاء، بيانًا رسميًا للاحتفال بذكرى مرور 111 عامًا على تأسيس النادي، والذي أنشئ في 24 من إبريل عام 1907.

رئيس النادي توجه بالشكر في كلمته إلى جمهور النادي ورموزه، وهنأهم بالحصول على النجمة الرابعة بتتويج الفريق الأول لكرة القدم بالدوري للمرة الـ40 في تاريخه.

وهنأ الخطيب جماهير النادي من خلال فيديو مصور من الإمارات، وذلك لأنه خضع خلال الأسبوع الماضي لعملية جراحية بعد شعوره بآلام في الظهر، ويبقى في الإمارات لعدة أسابيع حتى اكتمال شفائه.

بيان الخطيب جاء نصه: «زي النهارده.. بنينا على أرض مصر هرما رابعا .. وكتب رموز النادي الأوائل أول صفحة في تاريخ كبير جدا عظيم جدًا.. بيزيد كل يوم وبيكبر كل لحظة.. زي النهارده يوم 24 أبريل سنة 1907 فتح الأهلي بابه لمجد عايش معاه وعايش بيه وملازمه.. زي النهارده ابتدينا حلم بقى في كل بيت والأهم في صدور أولاده ومحبيه المخلصين.

«يوم 24 إبريل مش يوم عادي في تاريخ الأهلي .. لأنه كمان اللي اجتمعوا في اليوم ده مش عاديين؛ ولأن الكيان اللي أصبح حقيقة بعدها مش عادي.. في اليوم ده وضع عظماء الأهلي.. الزعيم مصطفى كامل ، والزعيم طلعت حرب، وأمين باشا سامي وعمر بك لطفي، وقبلهم الزعيم الوطني الكبير سعد زغلول، وضعوا الأساس لكيان تفخر بيه مصر كلها والوطن العربي والعالم.. الكيان ده مكمل بولاده وأعضائه وجمهوره.. الكل في حلقة.. في سلسلة من العطاء وإنكار الذات علشان يفضل الأهلي الحاجة اللي بتجمعنا كلنا واللي بنفخر بيها كلنا.

«زي النهارده بدأت الحكاية، وكل يوم .. جيل بيسلم الراية.. راية العزة والفخر والأمجاد اللي بترافق مسيرة أعظم نادي.. النادي العظيم بمبادئه قبل ما يكون عظيم ببطولاته.. النادي اللي مؤمن إن جمهوره وأعضاءه ومحبيه ولعيبته هم البطولة الأهم .. لأنه مؤمن أن البطولات من صنع أبناء الأهلي.. الرجال والسيدات".

أضاف: «كنت أتمنى أكون بينكم النهارده علشان نحتفل مع بعض بالمناسبة دي، لكن قدر الله وما شاء فعل، وأطمئنكم إني بفضل الله بخير، وأنا ممتن جداً لمشاعركم اللي غمرتموني بيها طول الفترة اللي فاتت واللي منحتني أمل كان أقوى من الألم، وإن شاء الله قريب جدًا هنكون مع بعض ونحتفل بعيد الأهلي وببطولة الدوري الأربعين وببطولات كتير حققها أبطال الأهلي في كل اللعبات الرياضية.

 

«قريّب إن شاء الله هنكون مع بعض، واحنا بنحتفل سوا.. لازم كمان نفكر في بكرة.. لأن شعارنا دايما هو «تاريخ.. مبادئ.. تطوير».. كلنا مع بعض حنبني الأهلي سوا .. وحنفذ برنامج عائلة الأهلي سوا .. وحنحافظ على هذا الكيان العظيم اللي مطلوب دايما إنه يكون في المقدمة لأن دا قدره ودا طريقه اللي مش ممكن يحيد عنه أبداً .. طريق الانتصارات والبطولات، والتاريخ اللي بيصنعه كل يوم.

«طوال الفترة اللي فاتت الأهلي ما غابش عني لحظة واحدة .. مش باتكلم بس عن الأمور الإدارية ومتابعتها كل يوم لكن عن الأهلي البيت والأسرة والحالة اللي بترافقنا في كل الظروف وبفضل الله وبيها بنقوى على الظروف .. ومن بعيد وبالذات في الاختبارات الكبيرة بتحس قد إيه إن فضل ربنا عليك كبير .. إنك بتنتمي لكيان قادر إنه يسكنك ويعيش جواك بهذا الشكل ويمنحك طاقة فوق الوصف.. الطاقة دي هي سر الأهلي وهي سر المحبة الكبيرة اللي صنعها في الـ 111 سنة واللي جعلت منه أكبر من مجرد نادي بنحبه أو بنشجعه .. جعلت منه حياتنا وعمرنا.

«النهاردة بنقول لجمهور مصر العظيم وجمهور الأهلي الوفي: كل سنة وأنتم طيبين .. كل سنة وانتم حراسه وصوته وفرحته، وبنقول لكل رموز الأهلي وإداراته على مر السنين: شكراً ليكم على كل اللي قدمتوه لبيتكم والتاريخ مش هينسى اللي قدمتوه على مدار سنين طويلة مرت فيها على الأهلي أسماء كتيرة كل واحد ساهم بجزء في بناء الكيان اللي بيجمعنا كلنا.. وبنقول لنجومه في كل الألعاب: كل سنة وأنتم على منصات التتويج ترفعوا اسم الأهلي وتكتبوا التاريخ للأهلي وليكم اللى يستاهل كل نقطة عرق مننا .. وبنقول لأعضائه: كل يوم وانتم متجمعين على حب الأهلي اللي بيفخر بيكم زي ما بتفخروا بيه.

واختتم: «كل سنة ومصر بخير ويا رب كل أيامنا تكون أعياد .. كل سنة والأهلي بخير .. كل سنة واحنا مع بعض متجمعين في حب مصر وحب النادي الأهلي اللي هيفضل بالجميع .. فوق الجميع».