نادية الجندي: "عماد حمدي كان بيغير جدًا.. ومكنش عايزني أمثل"

 كشفت الفنانة نادية الجندي أنها أحبت الفنان عماد حمدي، ولم ترتبط به لاستغلاله من أجل مساعدتها فى الظهور فى الأعمال السينمائية، كاشفة عن أن الفنان عماد حمدى كان غيوراً عليها جداً ولم يكن يرد لها أن تستكمل مسيرتها فى الفن.

وأضافت الجندي، خلال حوارها ببرنامج "أنا وأنا"، المذاع على قناة ON E، والذى تقدمه الإعلامية سمر يسرى: "أنا حبيت عماد حمدى بدليل إنى عشت معاه حولى 8 أو 9 سنين، مقدمنيش فى ولا عمل فنى، أنا حبيت عماد حمدى وأنا طفلة مراهقة كان عمرى 15 سنة، والمشكلة إن لو راجل كبير اتجوز بنت صغيرة فيبقى خايف لحسن أسيبه وده اللى بيخلق الضغوطات والمشاكل، عماد حمدى كان بيغير جداً ومكنش عايزنى أمثل".

وتابعت: "كان حاجة مهمة فى حياتى كان أبويا وكان أستاذي ولآخر يوم فى عمرى ما اتخليتش عن عماد حمدى، وخدته معايا أنا ومحمد مختار فى فيلم الباطنية".

 وأضافت: "استحملت فى بداية جوازى بعماد حمدى كتير عشان خاطر ابنى هشام، اتعلمت منه حبه لفنه وإخلاصه لزملاءه وزميلاته، هو من الجيل المحترم اللى فيه صفات مش موجودة دلوقتى، وأحلى حاجة خدتها من عماد حمدى ابنى هشام".

وقالت الجندي: "والدي ووالدتي مكنوش موافقين على جوازى بعماد حمدى بسبب فرق السن  بينا وقاطعونى حوالى سنة بسبب الجواز من عماد".