مؤلف بكار: كنت متأكد إن الناس مش هاتشوفه

أكد السيناريت عمرو سمير عاطف، مؤلف مسلسل الكارتون "بكار"، أنه لم يكن يتوقع كل هذا النجاح الذي حققه المسلسل بكل أجزائه خلال عرضه في رمضان والذي تم بثه لأول مرة عام 1990.

وفي معرض إشادة السيناريت عمرو سمير عاطف بالمخرج ياسر سامي، مخرج مسلسله الجديد "النهاية" للنجم يوسف الشريف، تطرق إلى مسلسله "بكار"، إذ قال: "أنا عادة ما باعملش كده وما باتكلمش عن شغل قبل ما يتعرض بس فيه حد له حق عليا ولازم اديهوله"، مضيفا "أنا بقالي 25 سنة باشتغل سيناريست وحصلتلى مفاجآت كتير في الشغل اكتر من انى اقدر افتكرها في اوقات كتير كنت بابقي متصور ان الشغل ها يفشل وبعدين الاقيه حقق نجاح ساحق".

وتابع عمرو سمير عاطف: "بكار مثلا كنت متأكد ان الناس مش ها تشوفه والنتيجة كانت 13 جزء وجايزة الدولة التشجيعية وترشيح للتقديرية وجوايز لا يتسع المقام لذكرها سواء ليا او لفريق العمل ده غير رسايل الماجستير والدكتوراة اللى اتعملت عنه ده طبعًا بالاضافة للشعبية والإقبال الجماهيري".

وأضاف السيناريت: "ساعات كانت المفاجأة بتبقي في اداء من ممثل او تصرف جميل من حد ما كنتش أتوقع منه ده او كنت فاهمه غلط مفاجآت كتير زي ما قلت واكتر من تسعين في الميه منها الحمد لله مفاجآت سارة ولكن أكبر مفاجأة جميلة قابلتها فى حياتى فى الشغل لغاية دلوقتى هى المخرج ياسر سامي".

واستكمل بقوله: "انا لما قابلت ياسر من سنه تقريبا ماكنتش اتصور ابدا انه ممكن يحقق النتيجة اللى هو حققها لان المسلسل بتاعنا ده صعب ومحتاج شغل ثرى دى ما حصلش في اي عمل مصري او عربي سواء سينما او تليفزيون قبل كده وكنا بنختلف كتير وتصورت ان اكيد المسلسل تصويره ها يقف اومش ها يتعمل كويس وفضل ياسر يشتغل شهور ويستحمل ملحوظاتى وفضل مكتم كتير قوي على شغل الثري دي وبعدين قريب طلب منى انى اروح المونتاج عشان اتفرج على الشغل اللى خلص وبعد ما اتفرجت ممكن اقول انى مش لاقي نقطة ضعف واحدة اتكلم عنها".

وأردف السيناريست: "ياسر عامل شغل ما كنتش اتصور انه ممكن يتعمل في مصر عايز اقول ان الثري دي اللى معمول عندنا احسن من مسلسلات امريكية مشهورة -وكلها ايام وتشوفوا التريلر ان شاء الله- وقيادته للممثلين هايلة اختياراته اصلا عظيمة حرصه على ادق التفاصيل تفانيه في العمل.. انا سعيد بالمفاجأة دى وبعيدا عن رد الفعل اللى ها يقابله المسلسل اللى باتمنى انه يكون كويس ان شاء الله فاللى اكيد حصل خلاص ان الدراما المصرية كسبت مخرج موهوب ومهم واستثنائي".

نذكر أن مسلسل "النهاية" للسياريست والمخرج ياسر سامي، يشارك فى بطولته بجانب يوسف الشريف، كل من ناهد السباعي وعمرو عبد الجليل ومحمد لطفي وسهر الصايغ وأحمد وفيق، ومن وإخراج ياسر سامي.

 وتدور أحداث المسلسل، حول كره يوسف الشريف بطل المسلسل للتكنولوجيا والتطور السريع، الذي يتم بسرعة البرق، خاصة أنه مهندس تكنولوجى، ويحاول بشتى الطرق وقف هذا التطور، ولهذا السبب تتحول حياة يوسف الشريف لمسار آخر، ويواجه الكثير من الضغوطات والمواقف الصعبة ويتم خطفه فى أحداث المسلسل.