شق حائط لإنقاذ شاب بطنطا من مصعد انحشر بالطابق الثامن

كتب - عاطف دعبس

- انقطع وير المصعد وسقط للطابق الثامن وانحشر وبداخله الشاب بين الحيطان

- عبد الفتاح خليفة يروي الساعة العصيبة بالتفاصيل

على طريقة فيلم "بين السماء والأرض".. أنقذ رجال قوات الحماية المدنية والإطفاء بالغربية بقيادة اللواء إيهاب عبد الحميد مدير الإدارة شابا يقيم ببرج سكني بالطابق العاشر في طنطا عندما انقطع وير المصعد وسقط للطابق الثامن وانحشر وبداخله الشاب بين الحيطان دون أي شيء يمنع سقوطه.

وخرج البواب والسكان على صوت سقوط المصعد وأخطروا الحماية المدنية والتي وصلت خلال دقائق وتمكنت من إحداث فتحة للجدار ثم شقت حديد المصعد لتفتح مساحة خرج منها الشاب وسط فرحة الجميع من أشداء قوات الحماية المدنية وقائدهم اللواء إيهاب عبد الحميد مدير الإدارة.

وأخطر اللواء طارق حسونة مدير أمن الغربية والذي أشاد بجهر قوات الحماية والإطفاء وقرر تكريمهم.

وكان الشاب عبد الفتاح خليفة قد تعرض للحادث وخرج بعد حوالي ساعة ونصف كان خلالها محبوسا بالمصعد المحشىر بين جدران المصعد دون أي شيء يمنع سقوطه في أي لحظة.

وقال: الحمد لله "ربنا كتب بي عمر جديد بمعنى الكلمة والفضل بعد ربنا لرجال الحماية المدنية في طنطا.. مهما قلت مش هقدر أوفي بجزء صغير من اللي عملوه عشاني.. خصوصا اللواء إيهاب مدير الحماية المدنية في الغربية.. والله العظيم إحنا لو في امريكا أو اي دولة أوروبية متقدمة ما هيحصل اللي عملوه عشاني.. أنا مش عارف اشكرهم إزاي ولا أشكرهم على إيه.. على سرعة رد الفل ولا على الخبرة في التعامل ولا على إيه والله منا عارف نفسي صوتي يوصل لكل الناس عشان يعرفوا اد ايه الناس دي مخلصة في شغلها "

وحول اللحظات العصيبة قال كنت نازل في الأسانسير من الدور العاشر الساعة 11 الصبح وأول ما دخلت الأسانسير وبدأ ينزل بيا واذ بي أفاجأ بالأسانسير بيقع من الدور العاشر دورين واتحشر في الحيطة.. الواير أو الحبال في الأسانسير اتقطعت وهبط بيا وهو بيخبط في الحيطة لحد ما اتحشر بين الحيطة بين الدور الثامن.. البكرة بتاعة الواير اتقطعت والأسانسير بقي متشعلق في الهوا بدون أي حاجة تمسكه وانا جواه.. طبعا السكان والبواب جم على صوت الخبطة لما وقع وبدأت أسمع أصوات الناس وهي بتتكلم وبيفكروا في الحلول. مكنش في اي حل لأن أي هزة في الأسانسير كان هيقع بيا من الثامن لأنه مفيش حبال ماسكاه أو اي حاجة خالص.. فقط محشور في الحيطة.. المهم بعد ما كل الناس احتاروا يطلعوني إزاي كان في آراء كتير ناس تقول نسحبه سنة صغيرة على ما يوصل للباب ويطلعوني.

لكن حسن البواب كان فاهم إن أي حركة ولو بسيطة هتؤدي إلى سقوط الاسانسير بي.. اتصلوا بالحماية المدنية.. والله العظيم والله العظيم في خلال أقل من ربع ساعة.. طبعا أنا عارف إن استحاله حد يصدق.. والله أقل من ربع ساعة... مدير الحماية المدنية بنفسه ومجموعة ضباط والمطافئ والإسعاف ومعاهم ونش رفع وكل المعدات اللازمة.. وبدأوا يفكروا هيطلعوني إزاي في ظل الوضع الصعب اللي كنت فيه لأن أي حركة بسيطة هيسقط بيا.. المهم بعد مباحثات قرروا يكسروا الحيطة بين الدورين عشان يطلعوني وهنا تظهر الاحترافية والمعدات.. شقو الحيطه بالصاروخ عشان ميبقاش في اهتزاز وعملوا فتحة وخرجوني من القبر اللي كنت فيه.. طبعا الحمد لله الحمد لله أنا كنت جوه مش عارف اعمل إيه من التراب نتيجة التكسير ومن الرايش بتاع الصاروخ وهو بيشق الحديد بتاع الباب، كل النار كانت بتدخل جوه بس الحمد لله... الفيلم ده كله في أقل من أو تقريبا ساعة ونص... الحمد لله.

واستطرد يحكي بطريقته الطبيعية فأكد. فعلا أنا مش عارف اشكر الناس دي ازاي وإيه الطريقة.. هل مصر فيها كده.. والله انا لو حد حكالي مش هصدق.. مش هصدق انهم خلال اقل من ربع ساعة يكونوا عندي.. مش عارف هما كانوا قاعدين مستنيين وإزاي يلموا بعضهم كل المجموعة دي بالمدير بتاع الحماية المدنية ويكونوا عندي بالسرعة دي.. الحمد لله ألف حمد وشكر ليك يا رب.

وفي ذات السياق كان رد اللواء إيهاب عبد الحميد في جملة واحدة "الحمد لله نقوم بواجبنا في حماية المواطنين وممتلكاتهم ونحمي كل روح على الأرض.. ولا شكر على واجب وتحيا مصر".