هدد برسائل واتساب.. قصة الخلاف بين محمد سعد ومخرج فيلمه الجديد

تصدر المخرج أحمد البنداري، "الترند" على منصات التواصل الاجتماعي وقائمة الموضوعات الأكثر رواجا، بعدما تحدث عن الأزمة التي جمعته بالممثل محمد سعد الشهير باللمبي، وذلك على خلفية فيلم "الدشاش" الذي كان من المقرر أن يتعاونا فيه سويا، وحذر في نهاية حديثه، صناع السينما من التعامل مع سعد بسبب عدم التزامه باتفاقاته.

 

 

وتعود تفاصيل هذه الأزمة، عندما عرض المخرج أحمد البنداري الفيلم على محمد سعد والذي بدوره تحمس له كثيرا، وبالفعل تم البدء في الإعداد للفيلم على مدى 3 شهور استعدادا للتصوير، واستهل المخرج حديثه قائلا عبر فيسبوك: "فيلم الدشاش ده اصلا اسمه كعب داير و كان مترشحله نجوم تانية يا ريتني كنت روحت لأي حد فيهم.. المهم عن طريق صديق مشترك وديته لمحمد سعد تحت اسم "الحاوي" و كان سعد ترشيحي انا رغم تحذير ناس كتير من التعامل مع سعد كنت مصمما عليه وشايفه نقلة ليا و ليه".

 

وأكمل المخرج، بقوله: "المهم بعد ٣ شهور شغل عليه من اللف على المنتجين بالتوازي شغل على التصور البصري كله directors treatment وvisual file وشكل الشخصيات واللبس والديكور وطريقة الإخراج والمونتاج والـ color pallet وستوري بورد كاملة علشان أروح للنجم بتصور كامل للفيلم مش رايحين نهزر يعني.. المهم بعد مكالمات ومواعيد كتير روحتلة البيت أنا والمؤلف (اللي مش بالوم عليه لأنه بقاله كتير مستني فرصة من نجم المفروض إنه كبير)".

 

وتابع المخرج أحمد البنداري: "المهم.. المفروض السيناريو كان عاجب سعد جداً ومتحمسله جداً خصوصاً انه كوميدي دراما مش فارس كوميدي زي كل أفلامه.. وكان في شركة كبيرة ومنتج كبير موافق على الفيلم بحذر طبعاً لسمعة محمد سعد مع المخرجين أنه لكني طمنته وقولتله ماتقلقش سعد عاجبه الفيلم ومتفقين على الخطوط العريضة كلها وكان شرط سعد الوحيد أن المنتج مايعترضش على أجره الكبير.. ده كان كلامه بالحرف".

 

وواصل المخرج أحمد البنداري: "المهم المنتج ده كلم سعد واداله أكتر من ميعاد وسعد لغى كل المواعيد لأسباب مختلفة.. لحد ما في يوم كلم هو المنتج وقاله أن الفيلم مش عاجبه، وأن السيناريو ضعيف وأنه عايز يبقى يحدد معاه ميعاد على فيلم تاني (لما نجم المفروض كبير يقول لمنتج أن الفيلم اللي بقالي شهور مجننه معايا فيه أنه فيلم ضعيف ووحش هو قتلي فرصي مع المنتج ده وقتها) المهم.. لما المنتج كلمني وقالي استغربت جدا لأن ده عكس كلامه ١٠٠٪".

 

وأضاف: "المهم بعدها كلمتة قالي نفس الكلام انه الفيلم مش عاجبه ماحبتش اطول في المكالمة خصوصاً أن ده حقه أنه يعجبه فيلم أو ما يعجبوش مع أنه مقالش كده من الأول بالعكس والحمد لله على نعمة التكنولوجيا الواتساب كله موجود.. بس الغريب أني أكتشف بعد كدة أن الدشاش هو الحاوي مع مخرج تاني ومنتج تاني ليهم كل الإحترام و التقدير والتمنيات بالتوفيق.. مع الفارق في نجم كبير جدا مش هقول اسمه روحتله بفيلم.. شوفت منه صراحة ووضوح في اللي عاجبه واللي مش عاجبه وقاري الفيلم كويس مش حد قاري وحاكيله الفيلم ده غير التزام رهيب في المواعيد مع أنه حقيقي مش فاضي لحد آخر ٢٠٢٥ يعني ممكن مانشتغلش الفيلم ده أصلاً مع بعض لكن عرفني ليه الراجل ده محافظ على نجوميته بقاله ٢٠ سنة تقريباً لأنه بيسمع للأخر وبيقرأ كويس وملتزم لأقصى الحدود".

 

وأنهى المخرج أحمد البنداري، حديثه: "ربنا يوفق الجميع وده كان تحذير لأي صانع أفلام من التعامل مع محمد سعد من غير ما يكون مأمن نفسه ومجهوده ١٠٠٪؜ لأن مجهودك والتزامك وصدقك دول شرفك في الشغلانة دي.. وهما اللي هيخلوك تعرف تحط صوابعك في عين التخين وتقوله كده غلط وعيب وما يصحش كده أنت المفروض كبير والكبير مابيلفش ويدور.. عموما انا بعد الموقف ده و موقف شبيه حصلي السنة اللي فاتت بدعي و بقول يا رب ٥ ملايين دولار ونبطل شغل".