أول تعليق من سمر حمزة بطلة المصارعة بعد فشلها في التأهل لأولمبياد باريس

علقت سمر حمزة لاعبة المنتخب المصري للمصارعة، بعدما ودعت منافسات وزن 76 كجم، في التصفيات العالمية المؤهلة لأولمبياد باريس 2024، والمقامة حاليًا في تركيا.

وخسرت سمر حمزة في أول مباراة لها أمام بطل منغوليا، وفقدت فرصتها في خوض أدوار الترضية أيضا، بعد عدم وصول بطلة منغوليا للمباراة النهائية.

ونشرت سمر، عبر صفحتها الرسمية على موقع التواصل الاجتماعي “فيس بوك“ قائلة: “أولا أنا حابة أقول الحمد لله والشكر لله، لله ما أخذ وله ما أعطى، وكل شئ عنده بأجل مسمى أسال الله أن يعينني، بقولها وبنفس راضية“.

وأضافت: “حابه بس أوضح لكل الناس اللي متابعني وبيحبوا سمر، أعرفكم عليا من جديد، سمر حمزه بدأت مصارعة آخر 2013، وعمري كان 18 سنه يعني لعبت المصارعة في سن كبير جداً لامكانيات لعبة عنيفة زي المصارعة“.

وتابعت: “بقالي 11 سنة في اللعبة الحمد لله فضل ونعمة من ربنا إني أبقى صاحبة ميداليتين عالم وأبقى مصنفة على العالم سنتين ورا بعض وفضلت بطلة إفريقيا من 2014 لحد 2023 وغير إني شاركت في أولمبياد ريو دي جنيرو وطوكيو وغير الميداليات الدولية“.

 

وواصلت: “أحب أوضح ليكم إني بقالي سنة بتمرن وأنا عندي قطع كامل في الغضروف، واتحاملت على نفسي ومعملتش عملية عشان مضيعش حلمي اللي بقالي 4 سنين بتمرن عشانه وكنت بلعب وبكسب ورغم كدة مطلعتش بررت شئ عشان أنا بلعب لنفسي لذاتي مش مستنية شيء من حد يشاء القدر واتصاب في الترقوه قبل التأهيل بردو بقت الإصابات غضروف وترقوة“.

وأردفت: “الدكتور قالي ملعبش بس جوايا حلمي فرض عليا إني أكمل، واتمرنت قبل البطولة أسبوعين بخش أتمرن بمسكن عشان أحقق حلمي، يشاء الله بعدم التوفيق ليا وفي حاجه تانية، حابة أوجه بس رسالة لبعض الناس أنا مخدتش رزق حد ولا خدت مكان حد أنا اجتهدت وربنا جزاني مفيش حاجة اسمها خدت أكتر من حقها بلاش تقولوا كلام مش فاهمين معناه“.

وأكدت: “عشان أي حاجة بتيجي لأي شخص فهو رزق من عند الله ولا أنت اللي بتدي ولا الشخص اللي عطاني هو مجرد بيوصل الرزق اللي ربنا كاتبه ليك“.

واختتمت: “أنا مش بقول كل الكلام ده عشان حد يتعاطف معايا، بس حبيت أوضح عشان سمر حمزة عمرها ما هتضيع حلمها، وهترتاح وهترجع وهتحقق بردو حلمها، كنت حابة أفرح وأفرحكم، بس إرادة ربنا فوق كل شيء“.