فيفي عبده: نفسي أحكي قصة حياتي بنفسي في عمل فني

قالت الفنانة فيفي عبده إنها تريد تنفيذ عمل فني يتناول قصة حياتها، مشيرة إلى أنها عانت الكثير خلال بداياتها الفنية.

 

 

وتضيف عبده، خلال لقائها في برنامج "حبر سري": "نفسي أعمل قصة حياتي وأنا أحكيها بنفسي زي ما أنا عشتها وحسيتها دون إضافات، زي أي إنسان بيعاني وبيتعب وبيلاقي ويتخدع، الإنسان بيمر بحاجات كتير".

وتابعت: "مشواري كان صعب أوي، وتعبت وساعات ببص لرجلي وأقولها تعبتي معايا، أنا حياتي كانت صعبة وأنا صغيرة، وبدأت من البداية خالص، وطلعت السلم واحدة واحدة وتعبت وعانيت وكنت فقيرة".

وأكملت: "أنا كنت فقيرة وبعد كده بقيت متيسرة وبقى عندي فلوس أعيش عيشة أحسن شوية، وعشت كل المراحل، واللي بيلاقي الحاجة على الساهل بتروح منه، الحياة فيها ظلم وخير، وناس بتساعدك وتطبطب عليكِ وناس بتدوس عليكِ، بس أنتي بتتعلمي من الحياة، وهي الدنيا كده".

كما دافعت فيفي عبده عن مهنة الرقص، بقولها: "اللي بيقول الرقص مهنة غير شريفة يخليه في حاله وميتفرجش، واللي بيحب الرقص هو اللي يتفرج عليه، مفيش فرح في العالم مفهوش رقص ولا فن موجود في كل العالم مش مصر بس، والرقص لغة مش محتاجة ترجمة".

وأتمت فيفي عبده: "أنا عانيت من نظرة الناس ليا، مع أن شغلتنا المفروض محدش يبصلها نظرة وحشة، والرقص زي الباليه وفن زي أي فن، وأنا من ضمن الفن ده وهو وظيفتي".