سوق علي مهلك سوق

بقلم : زيزي عاصي

اتعلمت السواقه من و انا عندي 16 سنه .. و من الوقت ده و بداية من اول رخصه عملتها لم اتعامل مع موظف واحد في المرور علي الاطلاق .. 

كنت بروح هانم اقعد في مكتب مدير المرور - ذات نفسه -حطه رجل علي رجل عبال ما اشرب حاجه تجيلي الرخصه لحد عندي.. 
اتهبشت في مخي و قليت عقلى و عملت 7 رجاله في بعض و قلت المره دي انا حروح لوحدي و مش حستعمل وسايط و مش حدفع رشوه.. 

مفروض بعد الثورة و كده خلاص لازم نقضي علي الواسطه و المحسوبيه و الرشوه .. وقلت حبدا بنفسي اخدت ورقي و اخدت معايا سكرتير والدي .. حرك و بيعرف يتصرف و اهو يكون معايا راجل .. 

رحت بدري قلت الحق قبل الزحمه ، بس يظهر في ناس كانت بايته من بليل .. زحام فظيع .. قلت مش مهم ربنا حيسر و استعنت علي الشقا بالله .. 

دخلت مكان فيه شبابيك كتير مزود بشاشات رقميه، قلت خير .. رحت اخد رقم قالولي اسحبي ملف الاول .. رحت سحبت املف و رجعت اخد رقم .. اللطيف في الموضوع ان الشاشات عطلانه و بالرغم من ذالك الموظف اصر انى اخد رقم ... و الظريف في الموضوع انه ما بصش فيه من الاساس .. اما الطريف في الموضوع بقى انه مبصليش انا شخصيا و لا سمعنى من الاصل .. 
الموظفين علي وجوهم غضب الله مش ممكن تلمح حد فيهم مبتسم ، عليهم جاعوره اجارك الله حاجه تقطع الخلف - منهم لله كان نفسي اخاوي البنت - ساديين و لا ابطال افلام توب موفيز .. هوايتهم تعذيب البشر و ذلهم .. 
رحت علي الشباك طبور الستات مكنش كبير ، بس خلال الوقفه عادي جدا تاخدلك كتف قانوني او بكس في وشك او تتفرم رجلك .. و ممكن تلاقى عيل فى ايدك امه حدفتهولك لحد ما تطلع حاجه من الشنطه او ترد على التليفون ، و غالبا مبتاخدهوش تانى و بتكمل الوقفه فى الطابور تلاعبه و هو على كتفك .... 

وصلت للشباك الموظفه قالتلي "روحي جيبي شهاده مخالفات من بره " 
رحت جبت المخالفات و الحمد لله و لا مخالفه واحده .. رحت بالشهاده للشباك بصت فيها و قالتلي "فين الختم روحي اختمييها بره " 
رحت ختمت و رجعتلها قالتلي "ناقص ختمين " و دول طبعا كل واحد فيهم في شباك مختلف ...

يعني هو مفيش رحمه كده خالص الجدع يعرف يدخل يختم يعني يجري ايه لو عملوهم ختم واحد 3 في 1 يعني هو الموظف اتشل في ايده مش حيقدر يختم التلاته .. 

اخر ختم ده بقى كان حيبقي فيه موتي .... تبرع سكرتير ابويا مشكورا انه يضحي بنفسه و انا حقيقه ممسكتش فيه .. راح و غاب و طالت الغيبه .. في الوقت ده قعدت اتامل الناس الى حوليا.... و يا رتني ما تاملت .. 

احنا شعب لا يعرف شئ عن مبادئ النظافه .. كنت حلاقى حدفي من اثر الروايح الي اتعرضتلها تقولوا سعقات كهربائيه ، و ده في الهواء الطلق .. امال دول لو دخلوا كلهم في مكان مقفول اكيد حيخلصوا علي بعض .. صوت عالي و خناقات و انا بتفرج .. جالي صداع وبعيد عن السامعين كرشه نفس و غثيان و دوخه.. بعدت شويه عن الجمع الغفير لعلي اجد نسمه حايره طايره استنشقها .. 
الناس طالعه تدعي علي الموظفين بدايتا من حسبي الله و نعم الوكيل ربنا المنتقم ..الي دعاء مفصل بنوعيه الانتقام .. وقفت جنبي ست تدعي عليهم ان الفلوس الي بياخدوها يصرفوها علي الدكتره و ان يجلهم المرض البطال ميلاقوش العلاج او يموتوا في حادثه ما يعرفوا يلموا جتتهم او يموتوا محروقين المطاف متلحق تطفيهم .. انا واقفه جنبها ببصلها و القشعريره هاريه جتتي من الدعاء الدموي ده و علي وشي علامات الهلع .. 

التفتت ناحيتي و بحركه فجائيه راحت ماسكه دراعي -ولا امين شرطه قافش حرامى غسيل - 
قربت مني وقالتلي بحده " انتي مش بتقولي امين ليه يظهر معاكي واسطه او تعرفي ناس مهمين " 
رديت عليها برعب " لا و المصحف ده انا حتي كل الناس الي اعرفها نكره و مش مهمين خالص و لا ليهم اي لازمه " -اعذروني يا روح ما بعدك روح- شدتني نحيتها و قالت "امال مش بتقولي امين ليه"؟ .. 

قعدت اقول امين امين امين لحد ما روحت من كتر الرعب 
المهم بعد طول غياب ظهر سكرتير ابويا - الحمد لله الدكتره طمنونا عليه شويه كدمات و كسور بسيطه مع ضيق فى التنفس و هبوط حاد فى الدوره الدمويه ، حيفك الجبس في خلال اسبوعين علي الاكثر- 

خلصت الورق و لله الحمد و جاء وقت التصوير نادو علي اسمي ، قعدت و معرفش ليه استبشرت خير لما الست قالتلي بصيلي نزلي دقنك لتحت شويه .. حسيت اني حطلع شبه  سعاد حسني في  فيلم خلى بالك من زوزو ....
استلمت الرخصه في فرح و لهفه و بصيت علي الصوره و هاتك يا عياط ... هو انا حلقيها من صوره البطاقه و لا صوره الرخصه .. كفايه اني اقولكم ان صورتي في البطاقه الي انا فيها شبه نعيمه الصغير في فيلم الشقه من حق الزوجه بالنسبه لصوره الرخصه..تعتبر شاكيرا .. 

قال قلت ابدا بنفسي قال و اقول لا للوسطه .. لا معلش ابداوا انتم و انا حخلص المواعين و اسلت ايدى  من الغسيل و اركب الميكروباز و احصلكم ان شاء الله .. و سمعني سلام سوق علي مهلك سوق.