إيمي سالم ترد على منتقدي كشف الموقف المهين مع محمد سامي
محمد إسماعيل
علقت الفنانة ومقدمة البرامج إيمي سالم على الانتقادات التي وجهت لها بعد حديثها عن المخرج والمؤلف محمد سامي.
ربما يعجبك
وكانت إيمي كشفت واقعة جديدة للمخرج محمد سامي، وقالت إنه أهانها أثناء حفل زفاف نيللي كريم، وعبرت عن استيائها مما حدث على صفحتها بموقع فيسبوك.
وكتبت إيمي خلال خاصية ستوري في حسابها بموقع انتسجرام للصور، اليوم الجمعة: "الناس التافهة اللي بتقول إني بدور على تريند.. بس يا هايف منك له تريند إيه مع واحد غايب عنه الأخلاق.. تريند إيه وأنا أصلًا مش باقية على أي حاجة مؤقتة في حياتي.. دا أنا اخترت أروح لندن من سنة عشان أبعد عن السواد والهيافة والنميمة والأحداث وسعوا مدارك التفكير الضيق دا شوية.. كفاية فراغ".
وكانت ايمي سالم روت الموقف المهين موضحة ما حدث "فيه حاجة سيئة حصلت، وكنت في حيرة أكتبها ولا لأ، لكن قررت أكتبها، ورغم إنها حاجة سيئة لكنها حصلت للأسف في يوم سعيد جدا، هو يوم فرح أختي وحبيبتي نيللي كريم، طبعا قبل أي شيء مبروك للمرة المليون لنيللي وكان يوم يجنن وده سبب سكوتي امبارح، لأني كنت عايزة الفرح ميتعكرش صفوه وجماله"
وأردفت: "كنت زمان بسمع كلمة إن الفنان الكبير الحقيقي، لازم يكون إنسان كبير كمان، بس يمكن إمبارح موقف أكدلي المقولة دي، طبعا كلنا شفنا مسلسل نسل الأغراب في رمضان، المسلسل اللي انتقده نحو الـ 300 مليون عربي، اللي انتقده حتى صناع العمل نفسهم وأبطاله كمان، وشفنا فيه إهدار المال يشكل مرعب"
وتابعت: "فيه عمل فني ركيك وضعيف للغاية، الحسنة الوحيدة فيه أسماء أبطاله الكبار جدًّا السقا، وكرارة، حتى الأبطال الثانين أدوارهم انهارت عشان المدام تتلمع، لدرجة إن الشركة المتحدة قررت وقف التعامل مع الأستاذ المخرج من كتر رداءة المسلسل، ودي أول مرة تحصل في تاريخ الدراما لمخرج"
وكشفت إيمي واقعة إهانة محمد سامي لها حيث قالت "طيب ايه بقى القصة، القصة إني في رمضان وقت عرض المسلسل، كنت زي كل الفنانين غالبا مش عاجبني المسلسل، فكتبت تعليق على بوست كتبه الصديق أيمن سليم السينارست، وكان تعليق منتقد للمسلسل، والنقد زي ما اتعلمنا جزء من الفن، ولازم الفنان يتقبل النقد لأنه ده الدافع الوحيد لتحسين أداؤه وتحسين إنتاجه، لكن إنك تلاقي فنان بياخد النقد على إنه خناقة شخصية، وعركة في شارع ومقاطعة وخلاف".
وتابعت "أنا مش هحكي عن علاقتي السابقة بإخوات الأستاذ محمد سامي البنات، وبزوج أخته اللي أعرفه قبل ما حتى آجي أعيش في مصر، إمبارح وأنا بتحرك في الفرح، لقيت الأستاذ المخرج المحترم أوي في وشي هو ومراته النجمة الأحادية التي لا تتكرر، فأنا لأني بنت ناس.. ولأني علموني إن انتقاد شيء قدمته في الفن مش خناقة وعركة، فلقيتني بنية صافية بقوله، هتسلم علي ولا مش عايز؟".
وأضافت "فما كان من الأستاذ محمد سامي المحترم أوي والراجل خالص، حرفيا بيدفعني بإيده بشكل عنيف وبيوسع الطريق لمراته، وكمان بيتلفظ بألفاظ سوقية عني، أنا سكت بس لحسابات، لأن تربيتي أولا متسمحش إني أنزل لمستوى الشوارعية والسوقية ده، وثانيا عشان الليلة الجميلة لنيللي تفضل ليلة جميلة".
وفي النهاية، قالت إيمي: "لكن حبيت أحكي الموقف بشكل علني هنا، عشان نعرف كلنا إزاي الأستاذ المخرج، شخص لا يعرف معنى الفن، ولا الزمالة ولا سمع عن الأخلاق، ولا يعرف ما معنى احترام المرأة، حبيت أقول الكلمتين دول عشان نعرف مين هو محمد سامي، شكرًا يا أستاذ محمد على أخلاقك، اللي فعلا شبهك".
جوجل نيوز
