صابرين توجه رسالة لحلا شيحة.. وترد على انتقادات الباروكة والحجاب‎

علقت الممثلة صابرين على أزمة حلا شيحة ووصفتها بالمريبة، وأضافت: "بالنسبة لي كان موقفا مريبا وانا أعرفها وهي خالعة الحجاب وهي محجبة ومنقبة في مناسبات مختلفة جمعتنا.. لكن الموقف الأخير كان مريبا، حسيت وقتها إن فيه حاجة غلط".

 

 

وتابعت صابرين في لقاء خلال برنامج "كلمة أخيرة" الذي تقدمه الإعلامية لميس الحديدي على شاشة "ON" قائلة: "ولما قرأت البوست كان غريبا برضه، انتي خلاص عملتي حاجة أو خدتي خطوة تمام بس مش كده يعني.. انتي كنتي رجعتي وعملتي مسلسل "خيانة عهد" مع يسرا".

وأضافت: "مش عارفة ممكن تكون تعرضت للتخبط في الفترة الاخيرة لما بعدت نسيت التمثيل وده عادي الفنان يتعرض   للتخبط"، لكنها عادت قائلة: "لكن اللي عملته كان "أوفر" شوية واكثر ما أزعجني في أزمتها علاقتها بالوالدها الفنان أحمد شيحة.. أي حاجة عادي لكن علاقتك بوالدك ماينفعش تبقى كده ابوكي راجل محترم جداً.. براحتك اتجوزي واعملي اللي إنتي عايزاه هي بني آدمة وحرة ولا اجرؤ أتكلم في ده.. لكن معلش إيه اللي ماعجبكيش في ابوكي وامك..  الاب والام مش خط أحمر بس ده خط "ملتهب"".

وأجابت الفنانة صابرين عن سؤال الإعلامية لميس الحديدي حول ما مرت به في حياتها من ارتداء الحجاب ثم خلعه واستبدال الباروكة به، ثم العودة لشعرها ومدى إن كان هذا "لخبطة" في الأفكار، قائلة: صابرين كانت بتعيش كل لحظة بصدق وده طبيعي كل ما بنكبر بنعيش لحظات معينة بصدق زي قصة حب عشتيها وبعدين باظت وبعد لما الواحد بيكبر بيستغرب وده تطور "النضوج".

وتابعت: "لما لبست الحجاب لبسته عن إيمان شديد وكنت في لحظات"لخبطة" خاصة بعد مسلسل أم كلثوم، حصل نجاح كبير واستقبالات في العالم وأوسمة متعددة".

وأكملت: "فيه أقنعة كتيرة اتشالت وسقطت بعد المسلسل من زملاء الفن بعضهم كانوا بيحبوني عشان حبوبة ولطيفة وبعدين فوجئت بيها بتسقط، وقلت وقتها أنا إيه ده؟ إيه الي بيحصل ده؟ باسم المنافسة انا مش بتاعت كده خالص.. أنا واحدة   بمشي جمب الحيط".

واستطردت: "جتلي حالة عزوف وقتها وكان عندي انفصال فاللخبطة خلتني أقعد في البيت لكن عن إيمان وإن الواحد بيحب يعمل اللي عايزه بصدق"، مضيفة: "لما قررت خلع الحجاب مجدداً حسيت إن ده مش صح أوي ولا اللي قبله كان صح برضه أوي وسألت نفسي: ليه أكون بثلاثة وشوش أو بوشين ؟!".

وردت على انتقادات الهجوم وقت ارتداء الباروكة قائلة: "قلت لنفسي مع الهجوم والانتقادات وتعليق الشماعات: ليه أخلي الباب   متوارب لزي كده".

وأتمت: "سألت نفسي ليه هكسب العالم واخسر نفسي؟ مش صح لازم أكسب نفسي ولقيت نفسي حابة نفسي دلوقتي أكتر وشكلي مش "فيك" فيه تصالح ورضا.. العلاقة بيني وبين ربنا حاجة خاصة جداً دي علاقة في السر وهي أسمى العلاقات".

كما وجهت رسالة لمنتقدي خلع الحجاب، قائلة: "اللي هينزل معايا القبر ويتحاسب  يحاسبني.. فيه ناس بتدخل على السوشيال ميديا يوجهولي رسائل من نوعية : بحبك في الله وانا بتقبل ده لكن فيه شريحة تانية شغالة بهدلة وتهزيء ودول لجان".