عاجل| خالد الغندور يفتح النار على أحمد فتوح: لا يتعظ.. ويجب بيعه فورًا

شنّ خالد الغندور، نجم الزمالك السابق، هجومًا عنيفًا على أحمد فتوح، لاعب الفريق الأول لكرة القدم بالنادي، بعد تداول مقطع فيديو يظهر فيه، خلال حضوره حفلًا للفنان راغب علامة، في الساحل الشمالي، برفقة إمام عاشور، لاعب الأهلي، وذلك خلال فترة معسكر الفريق.

وقال الغندور، في بث مباشر عبر حسابه على "فيس بوك": "اللاعب ده سبق له الدخول في أزمة كبيرة مع مرتضى منصور، بعدما رفض المشاركة في مباراة لأسباب مش هتكلم فيها”.

بعدها سافر الساحل وتعرض لحادث، ولما اتعمله كشف تبين أنه كان تحت تأثير مادة، وتسبب في وفاة شخص يعول أسرة، واتحبس شهرين ونص، وكان ممكن ياخد 5 سنين بسبب القتل الخطأ، لكن خرج بعد دفع دية بملايين، ولسه عنده قضية ربنا يستر عليه فيها.

“بعد كل ده، المفروض يكون اتعظ وشكر ربنا على النعمة اللي هو فيها، لأنه كان ممكن يكون دلوقتي جوه السجن".

وأضاف الغندور مستنكرًا: "إزاي لاعب يطلب إذن من النادي أثناء المعسكر علشان يروح حفلة؟! ويتشاف كمان في الفيديوهات؟! ده استهتار وعدم احترام للفريق ولا الجماهير، ده بني آدم واضح إنه مش بيتعلم من اللي حصل له”.

“وكل شويه نسمع عن غرامة مليون جنيه وتحقيق؟! ده سبق واتحبس ودفع ملايين، وكان عنده معسكر مهم قبل كده ورفض يرجع، وقال مش راجع غير بعد السهرة! وقبل مباراة تانية انسحب من التشكيل بعد ما عرف إن فيه كشف منشطات، وساعتها مرتضى منصور قال عليه كلام تقيل جدًا".

واختتم الغندور تصريحاته بقوله: "اللاعب ده مش هينفع، لا الغرامات هتأثر فيه ولا الإيقاف، لأنه ببساطة مش ملتزم، ولا فيه أمل إنه يتغير.. الحل الوحيد هو بيعه فورًا".