وائل القباني: لم أفشِ أسرار الزمالك.. وكل ما قلته كان توضيحًا للحقيقة

أكد وائل القباني، نجم الزمالك السابق، خلال مداخلة هاتفية مع برنامج "الكابتن"، أنه يتعرض لحملة منظمة ضده، مشيرًا إلى أن البعض يتهمه زورًا بإفشاء أسرار النادي، وهو أمر غير صحيح على الإطلاق.

 

وقال القباني: "في حملة معمولة ضدي، ومش عايز أعرف مين وراها، لكن اللي يتقال إني أفشيت أسرار النادي ده كلام غير دقيق. أنا ما طلعتش أسرار، ومغلطتش في أي شخص، كل اللي عملته إني وضحت شوية حقائق".

 

وأضاف: "أنا أشدت بـ أحمد سليمان وهشام نصر، وقلت إنهم وقفوا معانا في وقت صعب، ومش اتكلمت عن عيوب النادي، بالعكس، أنا وضّحت بعض الأمور بعد نهاية الموسم، مش وأنا شغال داخل النادي".

 

وأشار القباني إلى ضرورة التفرقة بين كشف الأسرار أثناء العمل داخل النادي، والتحدث عن بعض الوقائع بعد انتهاء المهمة الرسمية، موضحًا: "لما أقول إن في لاعيبة اتعاقبوا عشان الموبايل، أو إن الزمالك وفر 15 مليون جنيه في وقت صعب، أو أتكلم عن أزمة دونجا، هل ده يسيء للنادي؟ بالعكس، ده يوضح قد إيه النادي كان بيشتغل تحت ضغط، وازاي حاول يحافظ على النظام".

 

وشدد على أن ما قاله بخصوص أزمة اللاعب أحمد حمدي لم يكن فيه أي ضرر للنادي: "أنا قلت إن النادي هو اللي دفع مصاريف سفر أحمد حمدي، وإني بعته صورة الشيك، وده توضيح لحماية النادي من الكلام الغلط اللي كان بيتقال".

وفي ختام تصريحاته، قال القباني: "أنا مش قلقان، وبحب نادي الزمالك، وكل اللي قلته كان بدافع الصراحة والشفافية، ولسه في أسرار كتير ما قلتهاش حفاظًا على استقرار النادي، وأنا ما طلبتش أرجع للنادي تاني، بس اللي بيتهاجم دايمًا هو الراجل الصريح".