عاجل.. وكيل النائب العام والمجني عليه.. قصة تعكس حقيقة المؤسسات المصرية

لم يكن أحمد الشعراني، الشاب المصري، يتوقع أن يأتي حقه دون أن يتخذ أبسط الإجراءات القانونية بتحرير محضر بواقعة تعرضه للسرقة بالإكراه، فقد حال دون تحريره محضر، ظنه أن الإجراءات معقدة لتأتيه المفاجأة التي لا يتخيلها، في مصر مؤسسات ورجال يؤمنون أن الله وضعهم في أماكنهم لمنح المواطنين حقوقهم وحمايتهم.

مواطن يكتب «بوست» على موقع التواصل الاجتماعي فيس بوك، يشكو فيه من تعرضه للسرقة بالإكراه في محافظة الجيزة، معبرًا عن ألمه النفسي لعدم مقاومة الجاني، مكتفيًا بهذا البوست، يفاجأ بمكتب المستشار نجيب محفوظ وكيل النائب العام، يطلب منه الحضور، فإذا بوكيل النائب العام طالع «البوست»، وقرر الاستماع للشكوى والعمل على استعادة حق المواطن المجني عليه.

«إحنا موجودين في المكان ده موكلين من ربنا إننا نجيب حقوق الناس ونحميهم، وحالفين قسم بكده، وأنت أكيد لما اتعرضت للموقف ده حسيت إنك في موقف ضعف، وده ميرضيناش»، عبارة قالها وكيل النائب العام للمجني عليه، تعكس عظمة النيابة العامة وقضاء، مصر الشامخ ونماذج مشرفة لشرفاء مصر في مختلف مؤسسات الدولة.

وإليكم رواية الشعراني للقصة كما دونها على صفحته بموقع التواصل الاجتماعي «فيس بوك»: صحيت إمبارح على رقم غريب بيرن كتير، فرديت على اعتبار أنه ممكن يطلعوا بتوع سيلز العقارات، لكن لقيت حد بيتكلم بنبرة رسمية جدا وبيسألني؟ أستاذ أحمد شعراني؟ قلت له أيوه مين؟ قالي معاك مكتب نجيب محفوظ وكيل نيابة الجيزة، ونجيب بيه عايز يقابلك يا ريت تشرفنا النهارده.

لحد هنا أنا مش فاهم فيه إيه؟، أنا عملت إيه؟ لكن قمت لبست ورحت لهم، وهناك قابلت روبن هود الغلابة، نجيب محفوظ وكيل النائب العام في الجيزة، وبيقولي أنا قريت البوست اللي أنت كنت كاتبه بتاريخ ٤ مارس بخصوص تعرضك لسرقة بالإكراه في شارع البحر الأعظم، والحقيقة من صدق كلامك الموضوع ضايقني جدا، خاصة أنها دايرتي، وقررت أكلمك، وسألني: فاكر شكل اللي عمل فيك كده؟، قلت له طبعا، قالي قول والله العظيم أقول الحق، حلفت، راح مطلع لي صور مطبوعة للشخص اللي عمل كده وفعلا طلع هو.

قالي ليه معملتش محضر؟، قلت له أنا عارف إجراءات القسم معقدة شوية وقلت مش هتفيد بحاجة لأني حتى معرفش اسمه، قالي اطمن في ناس غيرك اتعرضوا لنفس الموقف واحد منهم على سبيل المثال اتاخد منه ٢٠ ألف جنيه، وعملوا محاضر، ومسكناه، والصور دي أنا اللي مصورها له بنفسي وهو حاليا محبوس على ذمة القضايا.

يومين كاملين تقريبًا قضيتهم في النيابة علشان ناخد كل الإجراءات اللازمة، لكن كان ملازمني شعور، وهو إني كنت مستغرب جدا، اهتمام أنا مش متعود عليه، الناس متعرفنيش ولا رايح بواسطة، أنا عمري ما اتعاملت مع النيابة أو القضاء عمومًا، لكن وكيل النيابة قالي كلمتين يتسطروا والله، وعرفت ليه الناس بتعظم دور النيابة والقضاء المصري وبتصفه دايما إنه عظيم، قالي إحنا موجودين في المكان ده موكلين من ربنا إننا نجيب حقوق الناس ونحميهم، وحالفين قسم بكده، وأنت أكيد لما اتعرضت للموقف ده حسيت إنك في موقف ضعف، وده ميرضيناش، نام مرتاح حقك هيرجع، وأنت مش ضعيف أنت اتصرفت صح علشان ده مجرم، وعنده تاريخ أسود، ومن ضمن اللي عمل فيهم كده كانوا اتنين مع بعض رايحين يوردوا فلوس الشغل، وكان ممكن يتلموا عليه يضربوه، لكن قدر ياخد منهم الفلوس كلها كانت ٢٠ ألف جنيه.

أنا لو كنت خدت حقي بإيدي مكنتش هبقى حاسس الإحساس اللي أنا حاسه دلوقتي، فخور إني عايش في دولة فيها قانون، وكلمتين عايز أقولهم للناس اللي شتمتني أو أتريقت ووصفتني بأني ضعيف، إنك تبقى محترم وابن ناس ومش همجي ولا بلطجي ده اختيار مش ضعف، وربنا قبل القانون مش هيسيبك.

شكرًا لكل حد عمل شير للبوست وتحية كبيرة لرجال النيابة العامة المصرية وتحيا مصر.

بوست الشعراني لاقى استحسان الآلاف من رواد مواقع التواصل الاجتماعي، حيث شيره وعلق عليه الآلاف مشيدين بموقف وكيل النائب العام معبرين عن احترامهم للقضاء المصري.

لكن رودود الأفعال لم تتوقف عند التفاعل الواسع على مواقع التواصل الاجتماعي، بل تم تكريم وكيل النائب العام نجيب محفوظ، فبتوجيهات المستشار محمد شوقي النائب العام بشأن متابعة أداء وكلاء النائب العام لعملهم وتحفيز المجتهدين منهم، استقبل المحامي العام الأول لنيابة جنوب الجيزة الكلية بمكتبه، نجيب محفوظ وكيل النائب العام بنيابة قسم الجيزة، ووجه له الشكر والتقدير على جهوده المتميزة في أداء عمله، بما لامس نبض الشارع المصري ووجدان المواطنين. 

وقال بيان النيابة العامة: «يأتي هذا التقدير تحفيزًا لأعضاء النيابة العامة على بذل المزيد من الجهد في أداء رسالتهم السامية والنهوض بها على الوجه الأمثل». 

قطعًا ما يحدث تطور كبير يعكس منهج وفلسفة الجمهورية الجديدة، دولة المؤسسات والقانون، وحماية الحقوق والتفاعل الإيجابي مع نبض الشارع، فقبل تلك الواقع بأيام كرّم الرئيس عبدالفتاح السيسي الفنان سامح حسين بالإشادة ببرنامجه «قطايف»، الذي يقدم رسائل هادفة، فكما يحفز الرئيس المتميزين، تحفز النيابة المجتهدين لحثهم على بذل المزيد من الجهد لخدمة الوطن والمواطنين.