"فركش" مسلسل "إش إش" لـ مي عمر

انتهت الممثلة مي عمر من تصوير آخر مشاهد مسلسلها الجديد "إش إش" تحت إدارة زوجها ومخرج المسلسل محمد سامي.

 

 

وشاركت مي عمر  مقطع فيديو عبر موقع إنستجرام، وهي رفقة زوجها ومخرج العمل محمد سامي، والفريق يهتف بكلمة فركش، وعلقت: "حقيقي مش قادرة أوصف إحساسي وأنا بودّع الشخصية اللي عشت معاها رحلة فيها كل حاجة من ضحك وبكاء وقلق وفرح. حبيت كل لحظة قضيتها وأنا بجسدها، وحاسة إن جزء مني هيفضل معاها دايمًا، وهيوحشني كل تفصيلة فيها بجد".

وتابعت: "شكرا لكل فرد من فريق العمل اللي اشتغل بإخلاص عشان يطلع العمل ده بأحسن شكل.. فريق العمل في "إش إش"، كان سر نجاح كواليس التجربة دي. كل حد في الفريق، من أول التقنيين لحد الإنتاج، كان بيشتغل من قلبه عشان يطلع العمل بأحسن شكل".

وأكملت: "بجد، ما حسيتش إني لوحدي لحظة، كلنا كنا إيد واحدة، ودايمًا بنسند بعض.. شكر كبير لكل واحد فيكم، على تعبكم وإخلاصكم وعلى كل لحظة قدمتوا فيها دعمكم وحبكم". 

كما تطرقت مي عمر في الحديث إلى زوجها، بقولها: "شكرًا ليك على صبرك وعلى نظرتك اللي كانت دايمًا بتشوف التفاصيل اللي ما حدش غيرك كان ممكن يلاحظها، وشكرا إنك بتعرف ازاي تخرج مننا أفضل ما عندنا، وعلى إبداعك وتوجيهك في كل مشهد.. شكرًا إنك كنت قائد حقيقي لينا وخلّيت "إش إش" يبقى تجربة ما تتنسيش".

وأنهت حديثها قائئلة: "منتظرة بفارغ الصبر تشوفوا "إش إش"، وأتمنى توصل ليكم مشاعرنا بنفس القوة اللي حسيناها.. شكراً لكل واحد كان جزء من الحلم ده! وبوعد الجمهور إن شاء الله هيتفرجوا علي مسلسل متعوب على كل شوط فيه.. مسلسل "إش إش" بإذن الله هيكون مسلسل بيحترم ذوق الجمهور". 

وتجسد مي عمر في المسلسل شخصية راقصة، وكانت قد أوضحت أن المسلسل لا يحتوى على مشاهد جريئة، ويضم "إش إش" بجانب مي عمر، كلا ماجد المصري وعصام السقا وإيهاب فهمي وانتصار وإدوارد.