شغل مخك

 بقلم :شهد راشد

في نوعين من البشر اليومين دول .. في رأيي المتواضع السبب الرئيسي في دا هو الأعلام و الفن .. يعني هو اللي بيسمع مهرجانات زي اللي بيسمع حمزه نمره و محمد منير و كايروكي .. طب اللي بيشوف أفلام زي حلاوه روح و عبده موته زي اللي بيشوف مثلاً الأيدي الناعمه أو 678 أو بنتين من مصر ...

واضح من رأيي أن مش قصدي أن دلوقتي كله وحش ولا أن زمان كله حلو .. بس للأسف الزمن كل شويه بيسوء و لو عايزين نحسنه لازم يكون في ضمير و لازم نختار القليل الكويس بدل الأستسهال ...

 

يعني لما يكون في بشر بيسمعوا الشبشب ضاع و العلبه الذهبيه و بيتفرجوا على حلاوه روح و عبده موته و الكلام دا هتنتظر منهم أيه غير الأجرام و أنعدام أخلاق و ضمائر ميته بل و عفنت كمان .. هروب من المدارس و خطف أطفال و كبار و سرقه و غش .. أبسط جريمه بيعملها البشر دول الغش في الأمتحان و الغش في مشاريع التخرج و الكدب عشان يطلع من أي مشكله-و أه دي جرائم أنسانيه- جنب جرائم تانيه زي مثلاً الخطف و السرقه و ترويع الأمنين و يكون أي بنت ماشيه في الشارع لأي سبب و بأي لبس ماشيه مرعوبه من كل الناس و كمان ممكن تمشي في شارع مليان كلاب بس متمشيش في شارع فيه شويه شباب !! 

 

بس ممكن نلاقي شباب تاني بيسمع كايروكي أو أغاني شويه هاديه عن المهرجانات حتى لو شعبي بس من الأخر أعمال فنيه ليها هدف و سبب مش تضيع وقت و أفكار سلبيه و خلاص .. بيكون شباب مثقف و مفكر و فيه أمل .. حتى لو غش في أمتحان مره مش بيكون دا العادي و مش بيتجه للجريمه مهما حصل .. مش هيتحول لحرامي و مجرم بسهوله زي النوع الأخر من البشر ...

 

مش هقول أن بس الأعلام و الأغاني و الأفلام هما المشكله .. أه في أنعدام تربيه و أنعدام أخلاق ناتج من أنعدام التربيه .. بس الأعلام و الأغاني و الأفلام اللي تقريباً بيشكلوا حياتنا يوم بيوم ليهم سبب كبير أوي و قوي !!

 

مش معنى كلامي نمنع أفلام السبكي مثلا-برغم أختلافي معاه- بس يكون في رقابه مش رقابه روتينيه بس رقابه من المجتمع .. يعني عينه من الناس تقريباً خمس أشخاص من المجتمع أعمار مختلفه بس مش أطفال و رجاله و ستات و كل حاجه من المجتمع .. و نفرجهم على الفيلم و نخاليهم يكتبوا رأيهم بكل صراحه و حريه .. و نجمع الأراء دي و نعمل منهم قرار لأن كدا كدا الفيلم هيتشاف و هينزل بس بلاش ينزل لكل الناس اللي بتقدر و متقدرش .. يعني ليه طفل تحت 18 سنه يشوف حلاوه روح و يقتل جارته ولا يشوف عبده موته و نشوفهم في الأعياد بيرقصوا على الكورنيش !! يعني فين المشكله لو قسمنا الأفلام تحت 16 و فوق 16 و فوق 18 و تحت رقابه الأهل و للأسر و غيره .. ف لما أسره صغيره تقرر تدخل السينما و معاهم طفل ما يخافوش أوي من فكره الفيلم و من ألفاظ الفيلم و من مناظر الفيلم (مصنف للأسره) !! أو مجموعه تحت 16 في أبتدائي و أعدادي قرروا يدخلوا السينما ميطلعوش بأفكار أكبر من أن مخهم يستوعب هي أيه و ليه و أنه فيلم بيعكس واقع (مصنف تحت 16) !! أو مجموعه عندها بتاع 18 سنه كدا يدخلوا فيلم بيناقش حاجات أكبر من سنهم و مخهم (مصنف تحت 18) !! 

 

مش هقول أن كل الأغاني تكون كايروكي و حمزه نمره و محمد منير .. ساعات بردو ممكن نسمع مهرجانات عادي .. بس المهم أني أكون فاهمه أني مش عايشه في مهرجان و أني لو شوفت حلاوه روح أنا مش عايشه جواه و أي ولد مش الولد البطل !! و لو شوفت عبده موته ف أنا مش عبده !! يعني الفيلم أو الأغنيه اللي بتخاطب مشكله_خد بالك مشكله- في المجتمع و عايزين نصححها بلاش تتحول المشكله لواقع الحياه المرير !!

 

حياتنا مش عبده موته ولا حلاوه روح ولا غيرهم .. و حياتنا مش كلها كايروكي و منير .. الحياه مش كلها عيال صايعه ولا الحياه كلها نخبه و مثقفين .. بس الحياه ميكس .. الميكس لذيذ لو عقلناها يعني و شغالنا مخنا و فكرنا كويس قبل ما نقلد تقليد أعمى !!

 

مثال صغير هختم بيه المقال اللي لو قعدت أتكلم فيه مش هيخلص ولا حتى بعد سنه كتابه !! لو نزلت محل هدوم عنده قسم رجالي و قسم حريمي زمان اللي هو من كام سنه كدا كان لا يمكن البنت ينفع تلبس لبس الولاد ولا العكس .. دلوقتي و مع التقليد الأعمى البنت مينفعش تلبس من قسم البنات في بعض المحلات ولا الولد ينفع تلابس من بعض محلات الرجاله !! يعني بجمله الأسفاف و النقل الأعمى عشان مش بنشغل الصندوق اللي في راسنا ممكن تشوف راجل لابس leggings منقوش أو بنت لابسه قميص .. أنا شوفت بنات صابغه شعرها أخضر و بنات تانيه صابغه أزرق !!

 

مش هقول أكتر من أننا محتاجين نشغل مخنا ونبي قبل ما ننفذ اللي بنشوفه و نسمعه و خلاص .. عشان نبطل نعيش خايفين من بعض ولا على بعض !