رسالة مؤثرة من رانيا فريد شوقي إلى شقيقتها الراحلة ناهد

وجهت الممثلة رانيا فريد شوقي، رسالة مؤثرة إلى شقيقتها المنتجة ناهد فريد شوقي ابنة الفنان الكبير الراحل فريد شوقي والفنانة هدى سلطان، والتي غيبها الموت عن عمر ناهز 73 عامًا.

واستهلت رانيا فريد شوقي رسالتها، بقولها: "للأسف بنعتاد الأحباب في حياتنا كأنهم خالدين في الدنيا زي ما نعتاد النعم كأنها مستمرة إلى الأبد وده من عيوب البشر أختي الحبيبة الغالية ناهد انا بعتذر لك لأني اعتدك في حياتي يمكن خيالي كان أضعف من إني اتصور فراقك".

وأكملت رانيا فريد شوقي رسالتها، قائلة: "يمكن خدتنا مشحانات الدنيا  وربنا نور بصيرتنا ورجعنا لحضن بعض والحب اللي اتربينا عليه وحبنا لبابا كان دايما بيجمعنا يمكن لاني تنسيت اننا بنكبر كلنا يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة اسمها استسلام وارادتها من حديد قوتك كانت بطمني عليكي".

وأضافت رانيا فريد شوقي رسالتها: "أنا مش عارفه أنا بكتب ايه بس اللي حساه أكبر بكتير من أي كلام مازلت مش مستوعبه ولما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته وطريقة كلامه  نظراته وهزارك وقولت للاحفاد اللي ماشفوش جدهم ناهد بقت نسخه من جدكم لما تشفوها كأنكم شفتوه سبحان الله والغريب اني من الشخصيات اللي بتخاف تدخل على حد متوفي لانه بيبقي آخر انطباع بيفضل في الذاكره عن الشخص لكن لما دخلت وشوفت وشك مبتسمه كأنك نايمة وبتحلمي حلم جميل حسيت انك شوفتي فريد ابنك بيستقبلك وخدك لحبايبك بابا وطنط هدي ومها أختنا ده تفسيري لابتسامتك الهادية الجميلة الواضحة اوي اللي هونت علينا كلنا فراقك و اللي مش هتفارقني اللي باقي من عمري".

وأنهت رانيا فريد شوقي رسالتها، وهي تقول: "كنتي راضية بكل اقدار الله و مسلمه أمرك لله إلي ان نلتقي يا اختي سلميلي علي بابا و قوليله الحياة من غيرك مش حياة و نفسي يجيلي في الحلم بقاله فترة غايب عني هتوحشيني اوي يا حته من ابويا و من قلبي".