ننشر نص أقوال طفل الدقهلية في واقعة تعذيبه على يد والدته لإجباره على التسول
الدقهلية - مي الكناني
عاقبت محكمة جنايات المنصورة، سيدة بالسجن لمدة 13 عامًا لتعذيبها نجلها وإجباره على التسول، وذلك بواقع 10 سنوات بتهمة الاتجار بالبشر و3 سنوات بتهمة تعذيب الصغير وإحداث عاهة مستديمة به.
ربما يعجبك
وصدر الحكم ضد "إ ا. ع."، 29 عامًا، بتهمة تعذيب نجلها "م أ. س" 9 سنوات، باستخدام خرطوم ومياه مغلية، وأحدثت برأسه عاهة مستديمة، بالإضافة لإصابات أخرى بجسده.
وحصلت "بوابة روزاليوسف" على نص أقوال الطفل المجني عليه أمام جهات التحقيق، وجاءت كالتالي:
ما تفصيلات حدوث إصابتك؟
"اللي حصل إن وأنا صغير، كنت سبع سنين، كنت قاعد مع ماما في الشقه بتاعتنا في برج الأمل، كنت قاعد بلعب في الشقة وغصب عني وقعت زجاجة زيت بتاعة ماما غالية شوية، فماما وقتها اتنرفزت جامد وقعدت تزعق فيا وتضربني، وكانت بتغلي حلة مياه على البوتاجاز، وقامت رمياها عليا فنزلت على راسي وضهري، وعملت لي حروق في شعري وضهري وكتافي، بعدها ماما خدتني عند الدكتور في مستشفى الجامعة علشان تعالجني من الحروق ويعملوا لي ترقيع، وكانوا بياخدوا من رجلي علشان يحطوا جلد جديد في راسي، بس أنا ماعرفش مدة العلاج قد إيه، وأنا مش فاكر، وبعدها كل اللي أعرفه إني كنت بتابع في مستشفى التأمين، وكان مركبنلي جهاز صغير علشان شعري يطلع، وبعد أسبوع وقعت على راسي والجهاز باظ وروحت الصيدلية حطتلي لازقة مكان ما اتعورت، والجهاز باظ، وبعدها روحنا لدكتور خيطلي مكان الجرح، وقال لماما نصبر شوية ووقفنا على كدا ومحطتليش حاجة تاني في راسي".
متى وأين حدث ذلك؟
" الحريق وقع عليا من سنتين تقريبا، وبتعالج من وقتها في مستشفى التامين في سندوب علشان يطلع لي شعر تاني، بس انا مش عارف التواريخ ماما اللي عارفة".
منذ متى وأنت تقيم رفقة والدتك إسراء ال.ع.؟
أنا عايش مع ماما من وأنا عندي أربع سنين تقريبا، وأمي كانت واخداني من أبويا بحكم محكمة.
هل سبق أن طالبتك والدتك بسؤال العامة من الناس لطلب المال منهم؟
هي ماما كانت بتنزلني علشان استلف من الناس بس، وكانت بتقولي هات منهم فلوس وأنا هبقى أرجعها بعدين.
هل هؤلاء الناس معلومين لشخصك أم من العامة؟
هم ناس في المنطقة وفي منطقة السوق مثلا.
وما كيفية سؤالك لهم لإعطائك المال؟
أنا كنت ممكن أقول لهم عايز 5 جنيه، 10 جنيه سلف أو أطلب منهم فاكهة أو أكل.
وما التصرف الذي بدر من والدتك حال عدم تمكنك من إحضار مبالغ مالية وتنفيذ ما تطلبه منك؟
هي كانت بتتنرفز وتزعق وكانت بتضربني بخرطوم على جسمي.
هل كنت تحاول طلب المساعدة أو الاستغاثة؟
لا أنا كنت بتألم من الضرب بس، وأوقات كنت بصرخ من الألم، بس هي كانت بتقولي مسمعش صوتك فبسكت.
وهل كانت تطالبك سالفة الذكر بتحصل على قيمة محددة من المبالغ لتتمكن من العودة للمنزل؟
هي كانت بتقولي عايزه 200 جنيه مثلا في اليوم أو 100 جنيه في اليوم.
ولماذا كانت تطالبك بذلك؟
هي كانت بتاخذ مني الفلوس دي وتقولي دي علشان ترفع بيها قضايا وعلشان أعالجك وأصرف عليك.
وهل نما إلى علمك عن سبب انفصال والديك؟
أنا ماما دايما بتحكيلي إن بابا وحش ومش عايزني، واني بابا أصلا كان متجوزها علشان الفلوس، وقالتلي إن هو اتجوزها 3 شهور بس وكان طمعان فيها.
هل سبق لوالدتك أن تلت عليك عن طبيعة حياتها الأسرية بالماضي؟
هي كانت بتحكيلي إن هي اللي كانت بتصرف على أخواتها وأمها بعد ما أبوها مات وكانت شايله همهم.
وهل يتردد عليك أهليتك من الأقارب من جهة والدتك؟
لا محدش بيجيلنا علشان في مشاكل بين أمي وأخواتها علشان الورث.
هل أخبرتك والدتك بطبيعة الخلافات القائمة بينها وبين أقاربك ووالدك؟
هي كانت بتقولي إن أخواتها طمعانين في الورث بتاعها علشان أرضها، وإن أبويا كمان وقت متجوزها كان طمعان فيها وطلقها علشان هي ما ادتلوش حاجة.
هل بدر من والدتك ثمة تعد لفظي أو جسدي عليك أثناء إقامتك رفقتها؟
هي كانت بتضربني وقت ما كانت تتعصب مني وتتنرفز، وكانت بتشتمني وبتضربني بخرطوم على دراعاتي وعلى ظهري.
وما المدة الزمنية التي كنت تتعرض خلالها للضرب؟
هي وقت ما بتكون متنرفزة قوي كانت بتفضل تضرب فيا ساعة تقريبا.
وهل بدر من والدتك ثمة تهديد أو وعيد تجاهك؟
هي كانت بتزعقلي وتضربني ودايما تقولي أوعى تتأخر.
صف لنا طبيعة التعامل بينك وبين والدتك خلال السنوات الخمسة التي قضيتها رفقتها؟
هي بتعاملني كويس وبتصرف عليا وبتذاكرلي وأنا بحبها، بس هي علشان بتضربني وقت ما تكون متعصبة جامد أو لما أتأخر عليها في الرجوع، فكانت بتعاقبني وقتها كنت بخاف منها شوية.
صف لنا طبيعة يومك؟
أنا كنت بصحى الصبح أنظف الشقة وأغسل المواعين، وبعدها أقعد أذاكر شوية، وبعد كده أنزل بقى شوية وأرجع لماما بطلبتها.
ما وسائل الترفيه التي تقدمها لك والدتك؟
أوقات توديني المراجيح بس ما بنخرجش كثير.
وهل تكلفك والدتك بأداء ثمة أعمال منزلية؟
أنا بغسل المواعين كل يوم وبنضف الشقة وبعمل لماما الشاي.
هل تسبب ثمة شخص آخر في إحداث ثمة إصابات بك؟
لا ما حدش تاني عمل فيا حاجة.
ما قولك فيما شهدت به فتحية م.ع.ال. بتقريرها بكون والدتك لا تصلح لتربيتك وتقديم الرعاية الكافية لك وأن والدتك تسيء معاملتك وتتعدى عليك بالضرب؟
هي ماما كانت بتضربني وقت ما كانت بتتنرفز مني بس، أو ما نفذلهاش اللي هي عايزاه، أو أتأخر في الرجوع بفلوس.
هل ترغب في العيش رفقة والدك؟
أيوه أنا عايز أروح أعيش مع بابا.
وما تعريف تعليلك لعدم رغبتك في الاستمرار بالعيش رفقة والدتك.. رغم سبق إقرارك بعدم اهتمام والدك بك؟
هو أنا بحبها بس أنا هعيش مع بابا أحسن لي وماما هي اللي كانت بتحكيلي كده عن بابا إنه مش كويس.
بمناظره الماثل تبين وجود ورم طفيف بإصبع اليد اليسرى والأوسط وبسؤاله عن إصابته وكيفية حدوثها، أجاب "ده بسبب إني بحط إيدي في الميه كتير فصوابع إيدي بتورم".
جوجل نيوز
