حكاية بنت بتتضرب قبل الجواز وبعده..!

بقلم : د. دينا أنور

نفسي أفهم مين اللي قال إن الست لازم تكون مسؤولة من راجل يحميها، سواء كان أب أو أخ أو زوج؟؟!

طيب ليه الغالبية العظمى بيتحكموا فيها ويقهروها؟؟

ليه نبطشية القهر عبارة عن تداول ما بين الأب والأخ ثم الزوج ويمكن كمان الإبن!!

طيب ليه المجتمع بيقبل ضرب الست وأهانتها وذلها، لكن ما بيقبلش طلاقها وبحثها عن سعادتها في حياة تانية، زي ما بيبرر للراجل الخيانة والغدر بالزوجة تحت بند إنها مش مريحاه..!

بطلتي النهاردة إنسانة معذبة من زمان ومستحملة من زمان، والمجتمع مبسوط بيها كده قوي قوي، بس يا ترى لو فكرت تتخلص من عذابها وتتحرر من ذلها وتعيش سعيدة نفس المجتمع ده هيرحمها؟؟!!!

على لسان بطلتي بتحكي وتقول: "أنا يا دكتورة بنت من أسرة متوسطة، والدي الله يرحمه توفى وأنا صغيرة، ووالدتي هيا اللي ربتنا وكبرتنا وعلمتنا أنا وإخواتي تعليم جامعي، أخويا كان هو المتحكم في كل شيء في حياتي، لما كان عندي ١٦ سنة حبيت حب حياتي، حبيبي كان شاب محترم وأخلاقه ممتازة وبيحبني قوي، وأنا كمان كنت بحبه قوي وفضل حبه في قلبي لحد ما خلصت الجامعة، اتقدم لي وكانت ظروفه مش مناسبة، فطبعاً اترفض من أخويا، ولما إعترضت اتهانت وانضربت بالحزام وأجبرني إني أفقد الأمل إني أتجوز حبيبي.

فضل أخويا يسيطر على حياتي كلها وهوا بيقنعني إنه مكان بابا الله يرحمه، بس أنا عمري ما حسيت الإحساس ده أبداً بالعكس، كان دايماً يحاول يتحكم فيا ويكسرني، حتى ورثي ما رضيش يديهوني وحاطط إيده عليه بحجة إنه هوا راجل البيت.

بعد الحياة الكئيبة دي قررت إني أتجوز أي حد وأخلص، وافقت على جوزي الحالي وكان إنسان ظروفه كويسه وعيلته محترمة، خلفت منه ولادي وعايشة معاه بقالي سنين طويلة، وقدام كل الناس أنا إنسانة سعيدة وجوزي بيصرف عليا وعلى ولادي كويس ومعيشنا عيشة كويسة، لكن الحقيقة غير كده خالص.

جوزي يا دكتورة ما بيتعاملش معايا غير بالضرب بسبب وبدون سبب، ماعندوش تفاهم غير بمد الإيد، على طول إهانة وضرب ضرب لحد ما أعيط، ولادي كمان بيشوفوني كتير وأنا بتضرب وبيقعدوا جنبي يعيطوا، كل ما أغضب وأروح بيت أهلي، أخويا يرجعني غصب عني عشان ماعندناش طلاق، ولما مرة قررت أثور لكرامتي وروحت القسم عشان أعمل محضر أثبت فيه ضرب جوزي ليا، أخويا جه أخدني من القسم غصب عني ومنعني أعمل المحضر وبهدلني وقاللي كده عيب!!

إديت لجوزي أكتر من فرصة عشان يتغير، ورجعت له أكتر من مرة بعد ما ضربني، بس هوا إيده دايماً سابقة عقله، ودايماً شايف إني لازم أسمع الكلام وما أتناقشش وأعيش زي ما هوا عاوز وأستحمل وأعيش وأصبر عشان ولادي، بس ولادي شايفيني حزينة طول الوقت، بحاول آخد الدنيا ببساطة وأفرح بأي شكل، بس خلاص مبقيتش قادرة أستحمل أعيش من غير كرامة.

نزلت اشتغلت وحاولت أشغل نفسي بالدراسة، بقيت بشتغل وبدرس عشان أحس إني بعمل حاجة لنفسي، وفي نفس الوقت بربي ولادي وعايشة مع جوزي والسلام، بس بالصدفة عرفت إن حبيبي الأولاني ما اتجوزش لحد دلوقتي، وإنه بقى رجل أعمال ناجح وظروفه إتحسنت جداً.

ما أكدبش عليكي يا دكتورة لقيتني غصب عني بحن لأيامنا ولحبه ليا وحنيته عليا، لقيتني كمان بفكر إني أشتغل أكتر وأعتمد على نفسي أكتر عشان أسيب جوزي وأتخلص من الجحيم اللي أنا فيه، كل ده رغم إني ما عرفتش حبيبي لسه بيحبني ولا خلاص نسيني، بس لقيتني قويت لما عرفت أخباره وعرفت إن إختياري لنفسي كان أصح من إختيار أهلي ليا.

ودلوقتي يا دكتورة أنا بشتغل كتير وبحاول أستقل مادياً عن جوزي عشان آخد القرار الصح وأنا مش تحت أي ضغط، ساعات أقول استحملي وخلاص عشان ولادك، وأرجع أقول ولادي عمرهم ما هيكونوا سعدا، وهما شايفين أمهم حزينة وبتتهان وبتتضرب، وساعات قلبي يقول لي من حقك تعيشي مع واحد بيحبك وعارف إزاي يسعدك، لكن بلاقي عقلي يقول لي خليكي مع جوزك وخلاص والمهم إنك سعيدة قدام الناس وقدام أهلك".

خلصت حكاية بطلتي، يااااااه يا مجتمع ظالم!!! كل الحيرة دي في قلب بنت قلبها اتكسر وجسمها إتوجع ونفسيتها اتدمرت وورثها إتسرق وبرضه مفيش حد عاوز يرحمها، وفي الآخر لو قررت ترمي كل ده وتعيش سعيدة تبقى في نظركم ست مستهترة !!

الجواز مش سجن إجباري لازم الست تعيش فيه سواء كانت سعيدة أو لأ، الست دي مش جارية لازم ترضى بأي إهانة عشان تحافظ على الشكل الإجتماعي، الراجل اللي يضرب مراته لازم يتأدب بالقانون ولازم يترمي في السجن عشان يعرف إن بنات الناس مش للإهانة، الإخوات اللي بيتحكموا في ميراث إخواتهم البنات لازم يبقى عليهم رقابة من الدولة تحاسبهم وتعاقبهم لو خدوا حاجة مش من حقهم.

وأخيراً الست كمان لازم تفهم إنها مش لازم تصبر وتستحمل ولا حاجة، إلا لو كان اللي جوزها عارف قيمتها وبيقدرها و يستاهل تستحمل عشانه، كل ست تقدر تشتغل وتعتمد على نفسها بس إحنا اللي إتعودنا نكسل ونستسهل وندور على راجل يصرف علينا،لو عيشتي في ظروف أقل وإنتي حرة وكرامتك محفوظة أهون مليون مرة من إنك تعيشي في مستوى عالي وإنتي مذلولة وتعيسة وما لكيش كرامة، وزي ما المجتمع بيبرر للراجل إنه لو مش مرتاح مع مراته يدور على الراحة مع واحدة تانية بإسم الشرع، إنتي كمان من حقك لو مش سعيدة مع جوزك تدوري على الحب والسعادة مع راجل تاني وتسيبي جوزك وتتجوزي اللي هيسعدك، لأن العمر اللي هتضيعيه عشان شكلك قدام الناس مش هتعرفي ترجعيه، ولا حد من الناس دي هينفعك لما تضيعي عمرك في الحزن.. بس خلاص..!