حكاية بنت وصفوها بالشيطان..!

بقلم : د. دينا أنور

خلال حضوري في مؤتمر نقابة الصيادلة جلست على طاولة واحدة مع إحدى الزملاء، انتهى الحوار بأن اتهمني أنني شيطانه ولازم يسلسلوني في رمضان مع الشياطين.. ومن وقتها وأنا بسأل نفسي إزاي نفس الإنسانة تتوصف بالملاك من خلال ملامحها وطباعها وفي نفس الوقت تتوصف بالشيطانة لأنها تتمرد على المألوف من نساء المجتمع..وإليكم نص الحوار:

أنا: هوا إنت ليه مابتبصليش في عيني وأنا بكلمك يا دكتور
هو: لأنك مش محجبة
أنا: وإنت مالك إذا كنت محجبة أو لأ.. إنت كده كده مش مسموحلك تبصلي غير كزميلة سواء كنت محجبة أو لأ
هو: وإنتي ليه تبيني جمالك للناس وتسمحيلهم يبصولك ويشيلوا ذنب بسببك وتشيلي ذنبهم
أنا: وأنا أشيل ذنبهم ليه.. هوا أنا مسؤولة عن كل إنسان ضعيف مش قادر يتحكم في غرايزه
هو: يعني إنتي عاوزه تتعبي الناس وخلاص.. ليه تخليهم يبصولك ويفكروا فيكي بطريقة حرام
أنا: يا دكتور إنت واللي بيفكروا زيك اللي إتعودتوا تفكروا في الست بشكل معين.. محدش علمك تحترم المرأة وتعاملها كإنسان زيك.. عشان كده مش بتستوعب إن في ست مش محجبة قاعدة قدامك ومش قادر تلمسها ولا تقربلها.. عشان كده عاوز كل ست مش في محيط حريمك تتحجب
هو: وإنتي ليه تفتنيني وتجبريني أبصلك
أنا: وإنت كمان ليه تفتني وتجبرني أبصلك.. لو أنا لازم أتحجب عشان إنت ماتبصليش يبقى إنت كمان لازم تتحجب عشان أنا ما أبصلكش
هو: إيه ده يا دكتورة..أعتبر دي إهانة؟!
أنا: لو إنت شايف الحجاب إهانة يبقى إنت اللي بدأت بإهانتي
هو: أنا هقوم من هنا قبل ما أتجنن.. الدكتورة عاوزة الرجالة تتحجب 
أنا: تقدر تسلم عليا بالإيد قبل ماتمشي يا دكتور
هو: الحمد لله ما بسلمش على (حريم)
أنا:بس أنا مش حريم، أنا دكتورة زميلتك، مش واحدة بتغمزلك ولا بتطلب رقم تليفونك
هو: ربنا يهديكي.. إنتي لازم يسلسلوكي مع الشياطين في رمضان
أنا:  مادام وصلت لمرحلة إنك إعتبرتني شيطان.. ده إعتراف بهزيمتك قدامي لأن الشيطان هوا اللي هزم آدم .. لكن الشيطان الحقيقي جواك إنت

خلص الحوار وهرب الدكتور الضعيف بعد ماخد درس قاسي على إرادته الضعيفة وغريزته غير الخاضعة لتحكمه، وبقيت أنا أفكر هل أنا فعلاً ممكن أكون شيطانة لمجرد إني مش بستسلم وبقول رأيي بكل وضوح، لكن اللي إتعلمته من حياتي السابقة إن أي شيء بنعمله عشان نرضي الناس عامل زي القرض اللي بتاخده من البنك فوق قدراتك.. تفضل تسدد فيه ويفضل حمل فوق كتافك ومايكونش عاوز يخلص.. غير لما تقرر تسدده مرة واحدة وتخلص وتعيش حر..!